अर्जुन कार्की
बागलुङ- आठौं राष्ट्रपति रनिङ शिल्ड प्रतियोगिता सकिएको १५ दिनपछि विजेताले बागलुङमा बुधबार पुरस्कार वितरण गरिएको छ । असार २३ र २४ गते सञ्चालन भएको प्रतियोगितामा १० स्वर्ण, ७ रजत र १ कास्य पदकसहित सिगाना मावि च्याम्पियन बनेको थियो । सिगानाले उपाधिसहित १५ हजार रुपैयाँ प्राप्त गर्यो ।

१० स्वर्ण, ३ रजत र १० कास्य पदक सहित दोस्रो भएको चिल्ड्रेन लाईफ बोर्डिङले १२ हजार तथा ६ स्वर्ण, २ रजत र २ कासय पदकसहित तेस्रो भएको रुद्रेपिपल माविले ९ हजार रुपैयाँ प्राप्त गर्यो ।
सोही अवसरमा प्रतियोगितामा पदक प्राप्त गर्ने खेलाडीलाई र पोखरामा सम्पन्न भएको प्रदेश राष्ट्रपति रनिङ शिल्डमा सहभागि १२ खेलाडीलाई पुरस्कृत गरिएको थियो ।

गण्डकी प्रदेशका सांसद इन्द्रलाल सापकोटाले खेलकुदका कारण विद्यार्थीहरु गलत क्षेत्रमा लाग्नबाट जोगिएको बताए । उनले खेलकुद स्वास्थ्य र राष्ट्र दुवैका लागि आवश्यकता रहेकाले विद्यार्थीलाई खेलकुदमा समावेश गराउँदा अनुशासनमा रहन सहयोग पुग्ने उल्लेख गरे । जिल्ला खेलकुद विकास समितिका अध्यक्ष धन बहादुर परियारले सवै विद्यालयमा एक खेलकुद शिक्षक अनिवार्य नियुक्त गर्नुपर्नेमा जोड दिए ।

प्रतियोगतामा एथ्लेटिक्स तर्फ छात्र र छात्राको १ सय, २ सय, ४ सय, ८ सय, १५ सय मिटर, ३ हजार मिटर तथा रिले तर्फ ४ गुणा १०० र ४ गुणा ४०० मिटर दौड समावेश थियो । त्यस्तै हाइजम्प, लङजम्प, त्रिपलजम्प, ज्याभलिङ थ्रो ८०० ग्राम र सटफूटमा छात्र तर्फ १२ पाउण्ड र छात्रा तर्फ ८ पाउण्डमा प्रतिस्पर्धा भएको थियो । प्रतियोगितामा छात्र÷छात्रा भलिबल, कबड्डी , मार्सल आर्टंसतर्फ कराते, उसु र तेक्वान्दोको प्रतिस्पर्धा पनि गराइएको थियो ।