काठमाडौं (हाम्रो खेलकुद) – इन्टरनेसनल नेप्लिज तेक्वान्दो एसोसिएन (इन्टा) मा ओलम्पियन विधान लामाले निरन्तरता पाएका छन् । अमेरिकाको पोटल्यान्डमा बिहीबार सम्पन्न इन्टाको तेस्रो साधारण सभाले लामालाई अध्यक्ष पुनः निरन्तरता दिएको हो ।

१७ सदस्यीय इन्टाको कार्यसमितिमा प्रथम उपाध्यक्षमा सविता राजभण्डारी, उपाध्यक्षमा सपना मल्ल, अच्युत बास्कोटा, कमल खत्री चयन भएका छन् । त्यस्तै महासचिवमा नारायण गुरुङले निरन्तरता पाएका छन् । निर्मल श्रेष्ठ सह सचिव र किशोर श्रेष्ठ कोषाध्यक्ष चयन भएका छन् । साधारण सभामा विशेष अतिथिका रुपमा सहभागी कीर्तिमानी पदक विजेता ओलम्प्यिन दीपक विष्टका अनुसार रणुका मगर, बन्दना श्रेष्ठ, रितु जिमी राई, निञ्जन श्रेष्ठ, पासाङ लामा, पदमा गुरुङ, निमा राई, पुष्प थापामगर र कल्पना क्षेत्री इन्टाको सदस्य रहेका छन् ।

इन्टाका अधिकांश पदाधिकारी र सदस्यले विभिन्न अन्तर्राष्ट्रिय प्रतियोगितामा नेपालको प्रतिनिधित्व गरिसकेका छन् । इन्टाको बिहीबार नै बसेको कार्यसमितिको पहिलो बैठक नेपालमा गएको बाढी, पहिरो पीडितका लागि २ लाख रुपैयाँ सहयोग गर्ने निर्णय गरेको छ ।

बैठकले इन्टाको सहयोगमा सुरु भएको एभरेष्ट तेक्वान्दो च्याम्पियनसिपलाई वल्र्ड तेक्वान्दो फेडेरेसन (डब्लूटिएफ) ले आधिकारिक प्रतियोगिताको रुपमा स्वीकार गरेकोमा खुसी व्यक्त गर्दै धन्यवाद दिएको छ । त्यस्तै इन्टाले नेपाल तेक्वान्दो संघसँग समन्वय गरि आर्थिक, भौतिक पूर्वाधार निर्माण, तेक्वान्दो खेल र खेलाडीको विकासका लागि सम्पूर्ण हिसाबले सहयोग गर्ने प्रतिबद्धता पनि बैठकले गरेको छ । बैठकले विशेष अतिथिका रुपमा सहभागी भएकोमा ओलम्पियन विष्टलाई धन्यवाद दिएको थियो ।