काठमाडौं (हाम्रो खेलकुद) – प्रथम शेर बहादुर देउवा कप राष्ट्रिय कराते प्रतियोगिताको दोस्रो दिन पनि नेपाल पुलिस क्लबले पहिलो दिन जितेको ३ स्वर्णमा थप ३ स्वर्ण जितेको छ ।

सातदोबाटोस्थित कराते एकेडेमी हलमा जारी प्रतियोगिताको दोस्रो दिन शुक्रबार पुरूष ६० केजीमा एपिएफका मिन बहादुर तामाङले स्वर्ण जिते । उनले फाइनलमा नेपाल प्रहरीका लिजन साउदलाई ९-२ को सहज स्कोरमा माथ दिए ।

पुरूष ५५ केजीमा त्रिभुवन आर्मीका एलोन श्रेष्ठ पहिलो भए । उनले फाइनलमा आर्मीका राहुल चौधरीलाई ८-३ ले हराए ।

८४ केजीमा इश्वरधन राईले आर्मीका विकास खड्कालाई ९-४ ले हराउँदै स्वर्ण जिते । एपिएफका प्रतिक घर्ती मगर र गण्डकीका विशाल थापा मगर तेस्रो भए ।

पुरूषकै ६७ केजीमुनि तौल समुहको फाइनलमा एपिएफका प्रदीप बैजाली मगरले आर्मीका किरण पुनलाई ११-६ को स्कोरमा हराए ।

प्रतियोगिताको‌ महिला ६८ केजीमुनि आर्मीकी सानी तामाङले स्वर्ण जितिन् । फाइनलमा उनले लुम्बिनी प्रदेशकी गीता पुवारेलाई ५-३ ले हराइन् ।

४५ केजी तर्फको फाइनलमा नेपाल पुलिसकी वर्षा बुढा मगरले एपिएफकी दीपा लामालाई ५-१ को स्कोरमा हराइन् । ६१ केजीमा भने नेपाल पुलिसकी निरूपा दोङ तामाङले पहिलो स्थान प्राप्त गरिन् । उनले आर्मीकी रमिता माझीलाई १२-५ को सहज नतिजामा पराजित गरिन् ।

यल कराते सितोरियो डोको आयोजना र प्रदेश खेलकुद विकास परिषद, वागमती प्रदेशद्वार प्रायोजित तीन दिने प्रतियोगितामा पुरूषमा ८६ र महिलामा ७५ गरी कुल १ सय ६१ खेलाडीको सहभागीता रहनेछ। पुरूषतर्फ १० र महिलातर्फ ९ गरी १९ स्पर्धामा प्रतिस्पर्धा हुनेछ।