काठमाडौं (हाम्रो खेलकुद)- ललितपुर जिल्ला किक बक्सिङ संघको आयोजनामा छैटौं गणेशमान सिंह स्मृति राष्ट्रिय खुला किक बक्सिङ चापागाउँमा बिहीवार सुरु भएको छ ।

पहिलो दिन पुरुष ५५ केजीमुनि नेपाल क्योकुसिनका एलिस बम्जन, आर्मीका जनकबहादुर धामी, डन किक बक्सर्सका आशिक कोल्ह र आर्मीका प्रवीण माझी सेमिफाइनलमा प्रवेश गरेका छन् ।

महिला ४५ केजीमुनि एपिएफकी रिना माझी, बुदो उसुकी सरु राई, टोखा सो क्योकुसिनकी अस्मिता दोङ तामाङ र आयोजककी करिष्मा कार्की सेमिफाइनलमा पुगेका छन् ।

त्यस्तै महिला ६० केजीमुनि एपिएफकी सुमित्रा नगरकोटी, आर्मीकी अप्सरा कुमाल, स्ट्रोङगेस्ट मुवाँथाईकी समनेह राज्वी र थुलुङ दुधकोशीकी मेसकुमारी कार्कीले सेमिफाइनल यात्रा तय गरेका छन् ।

प्रतियोगिताको पूर्व उप प्रधानमन्त्री पूर्णबहादुर खड्काले एक कार्यक्रमबीच उद्घाटन गरे । प्रतियोगितामा ३ विभागीय टोली नेपाल पुलिस क्लब, त्रिभुवन आर्मी क्लबका , एपिएफ तथा सातै प्रदेशका क्लबका १ सय ३ पुरुष र ४९ महिला गरी १ सय ५२ खेलाडीको सहभागिता रहेको छ ।

गोदावरी नगरपालिकाको मुख्य प्रायोजनमा रहेको प्रतियोगिताको पुरुषमा ६ र महिलामा ५ गरी ११ स्पर्धामा समावेश छन् ।
हरेक स्पर्धाको विजेताले ३०, दोस्रोले‌ १५ तथा तेस्रो हुने दुई खेलाडीले समान ८ हजार रुपैयाँ पाउनेछन्।शीर्ष तीन हरेक स्वर्ण विजेताले अनरको मोबाइल प्राप्त गर्नेछन्।

प्रतियोगिताको च्याम्पियन टोलीले १ लाख, दोश्रोले ५० हजार र तेश्रो टोलीले २५ हजार रुपैयाँ पाउने छन् । उत्कृष्ट पुरुष/महिला खेलाडीले २५ हजार रुपैयाँ पाउनेछन्। प्रतियोगिता शनिबार सम्पन्न हुनेछ ।