काठमाडौं (हाम्रो खेलकुद)- नेपाली‌ भरतसिंह महत पेरिस पारालिम्पिक्सको तेक्वान्दोको‌ आफ्नो पहिलो खेलबाटै बाहिरिएका छन्।

भरत बिहीवार जापानिज खेलाडी मित्सुया तानाकासँग पराजित भएका हुन्। पेरिसस्थित ग्रान्ड पेलेसमा तेक्वान्दोको के-४४ क्याटगोरीअन्तर्गत पुरुष ५८ केजीमुनिमा भरत तानाकासँग १३-३ अंकले पराजित भएका‌ हुन् ।

भरत पेरिस पारालिम्पिक्सको पहिलो चरणबाट बाहिरिए। एकपक्षीय खेलमा उनी एक समय १२-० ले पछि परिसकेका थिए। ३ अंक त जोडे तर कुनै पनि समय जापानी प्रतिद्वन्द्वीलाई चुनौती समेत प्रस्तुत गर्न सकेनन्। योसँगै उनी पेरिस पारालिम्पिक्सबाट बाहिरिएका छन्। उनी वाइल्ड कार्ड मार्फत पेरिस पारालिम्पिक्समा छनोट भएका थिए।

भोलि नेपालबाट सबैभन्दा बढी पदकको आश गरिएकी पलेशा गोवर्धनले के – ४४ क्याटगोरीको महिला ५७ केजीमुनि तौल समुहमा भेनेन्जुएलाकी भलेरिया मोराल्ससँग प्रतिस्पर्धा गर्नेछिन्।

पलेशा छनोट चरण पार गरेर पेरिस पारालिम्पिक्समा स्थान पक्का गरेकी हुन्। उनको यो दोस्रो पारालिम्पिक्स सहभागिता बन्नेछ। यसअघि टोकियो पारालिम्पिक्समा वाइल्ड कार्ड मार्फत छनोट हुँदा उनले दुई वाउट जितेर ऐतिहासिक सफलता प्राप्त गरेकी थिइन्।

त्यतिबेला कास्य पदक भिडन्तमा भने चीनकी खेलाडीसँग पराजित भएकी थिइन्। उनी ओलम्पिक्समा नै नेपालको लागि जित निकाल्ने पहिलो खेलाडी समेत बनेकी थिइन्। यसको चार वर्षपछि पलेसा छनोट हुँदै पेरिस पारालिम्पिक्सको यात्रा तय गर्न सफल भएकी हुन्।‌

यो पटक तेक्वान्दोका दुई र पौडीका भीमबहादुर कुमाल गरी कुल ३ नेपाली खेलाडीको सहभागीता रहेनेछ।

यसअघि हिजो भएको उद्घाटन समारोहको मार्च पासमा नेपालको झण्डा पलेशाले नेपालको झण्डा बोकेकी थिइन्।

नेपालबाट सहभागी हुने ३ खेलाडी र २ प्रशिक्षक पेरिसमा छन् । तर पलेशा मात्र मार्च पासमा सहभागी गराइयो। बाँकी पदाधिकारीहरू मार्च पास र उद्घाटन समारोहमा सहभागी भएका थिए।