काठमाडौं (हाम्रो खेलकुद)– दक्षिण एसियाली खेलकुद (साग) को १३ औं संस्करणका पदक विजेता ३ खेलाडीले भियतनाममा आयोजना हुने आठौं एसियन पुम्से तेक्वान्दोमा प्रतियोगितामा भाग लिने भएका छन् ।

एसियाली खेलकुदकी कास्य पदक विजेता समेत रहिसकेकी आयशा शाक्यले एसियन पुम्सेलमा ४० वर्ष मुनीको उमेर समूहको व्यक्तिगत पुम्सेमा प्रतिस्पर्धा गर्नेछिन् ।

विश्व तेक्वान्दो तथा एसियन तेक्वान्दो युनियनको आयोजनामा जेठ १ र २ गते सन्चालन हुने प्रतियोगितामा १३ औं सागकी स्वर्ण पदक विजेता निशा दर्नालले महिला ३० वर्ष मुनि र अश्मिन राउतले पुरुष ३० वर्ष मुनीको व्यक्तिगत पुम्सेमा प्रतिस्पर्धा गर्नेछिन् । अश्मिन १३ औं सागका कास्य पदक विजेता हुन् ।

आयशा नेपाली तेक्वान्दोकी सर्वाधिक सफल महिला खेलाडी मध्ये एक हुन् । आयशा साग तेक्वान्दोको गेरुगी र पुम्सेमा स्वर्ण पदक जित्ने एक मात्र खेलाडी हुन् । सन् २००६ मा उनले एसियाली खेलकुदमा कास्य पदक जितेकी थिइन् ।

५ वर्षअघि स्वदेशमा आयोजना भएको १३ औं सागको व्यक्तिगत पुम्से र जोडीमा स्वर्ण पदक जितेकी आयशाले ११ औं सागमा गेरुगीतर्फ स्वर्ण पदक जितेकी थिइन् । त्यस्तै सन् २००६ (दसौं साग) र २०१६ (१२ औं साग) मा गेरुगीमा रजत पदक जितेकी थिइन् ।

राष्ट्रिय खेलकुद परिषद्का सदस्य सचिव टंकलाल घिसिङले विदाई गरेको ३ सदस्यटी टोली आइतबार नै त्यसतर्फ लागेको छ ।