काठमाडौं (हाम्रो खेलकुद) – ललितपुर जिल्ला खेलकुद विकास समिति र ललितपुर जिल्ला उसु संघको संयुक्त आयोजनामा प्रथम विपी स्मृति राष्ट्रिय उसु प्रतियोगिता २०८१ को वैशाखमा हुने भएको छ ।

प्रतियोगितामा सान्डा (फाइट) तर्फ मात्र प्रतिस्पर्धा हुने ललितपुर जिल्ला खेलकुद विकास समितिका अध्यक्ष विनोद महर्जनले बिहीबार आयोजित पत्रकार सम्मेलनमा जानकारी गराए । वैशाख १३ गते सुरु हुने प्रतियोगितामा महिलामा ४ र पुरुषमा ६ गरी १० तौलसमूहमा खेल हुने ललितपुर जिल्ला उसु संघका अध्यक्ष पञ्चराम महर्जन जानकारी दिए ।

प्रतियोगितामा सात प्रदेश, नेपाल प्रहरी, नेपाल आर्मी र एपीएफ गरी १० टिमको सहभागिता रहने छ । प्रत्येक टिमबाट एक तौलसमूहमा १ खेलाडीले सहभागिता जनाउन पाउने छन् । हरेक तौलसमूहको विजेताले १० हजार, दोस्रोले ५ हजार र तेस्रो हुने २ जनाले समान २ हजार ५ सय रुपैयाँ प्राप्त गर्नेछन् ।

उत्कृष्ट महिला÷पुरुष खेलाडीले समान १० हजार रुपैयाँ पाउनेछन् । प्रतियोगितामा पहिलो हुने टोलीले ५० हजार, दोश्राले २५ हजार र तेश्रोले १५ हजार रुपैयाँ प्राप्त गर्नेछन् । तीनदिने प्रतियोगिताका खेलहरु ललितपुरको मंगलबजारमा हुनेछ ।

आयोजकका अनुसार प्रतियोगिताको परिकल्पनाकार बागमती प्रदेशका सांसद् एवं राष्ट्रिय खेलकुद परिषद्का पूर्व कोषाध्यक्ष मिनकृष्ण महर्जन हुन् । प्रतियोगितामा ३१ लाख रुपैयाँ भन्दा बढी हुने खर्च हुने अनुमान गरिएको छ ।