काठमाडौं (हाम्रो खेलकुद) – कृष्ण प्रसाद भट्टराई स्मृति राष्ट्रिय कराते प्रतियोगिताको तेस्रो संस्करणको तयारी पूरा भएको आयोजक जिल्ला प्रमुख डोजो ललितपुर, लगनखेल जानकारी दिएको छ ।

गोदावरी नगरपालिकाको मुख्य प्रायोजन तथा नेपाल कराते महासंघको तत्वावधान एवं प्राविधिक सहयोगमा प्रतियोगिता माघ १८ देखि २० गतेसम्म सातदोबाटोस्थित कराते हलमा हुनेछ । प्रतियोगितामा महिला तर्फ ४५, ५०,५५, ६१, ६८, ६८ के. जी. माथि, काता र टिम कातामा तथा पुरुष तर्फ ५०, ५५, ६०, ६७, ७५–८४, ८४ के.जी. माथी, काता र टिम काता तथा प्रतिस्पर्धा हुने बताइएको छ ।
१७ तौल समूहमा प्रतिस्पर्धा हुने यस प्रतियोगितामा प्रत्यक टिमबाट २१ खेलाडी, दुई प्रशिक्षक र १ व्यवस्थापक सहित ७ वटै प्रदेशका टोली र ३ विभागीय टोलीका गरि २ सय ४० खेलाडी, प्रशिक्षक, व्यवस्थापक र ५० राष्ट्रिय तथा अन्तर्राष्ट्रिय निर्णायक र २० जना प्राविधिकहरु गरी ३ सय १० जनाको प्रत्यक्ष सहभागिता रहने प्रतियोगिताका संयोजक दीपक श्रेष्ठले जनाएका छन् ।

नेपाल कराते महासंघको बार्षिक क्यालेण्डरमा समावेश प्रतियोगिता आयोजना गर्न करिव ५५ लाख रुपैयाँ खर्च हुने अनुमान गरिएको छ । प्रतियोगिताको च्याम्पियन हुने टोलीले ट्रफी सहित रु. १ लाख र दोस्रो हुने टोलीले ट्रफी सहित ५० हजार रुपैयाँ प्राप्त गर्नेछ । प्रतियोगिताको सर्वोकृष्ट महिला तथा पुरुष खेलाडीले ट्रफी सहित समान २५ हजार रुपैयाँ पाउनेछन् ।