धरान (हाम्रो खेलकुद)- लुम्बिनी प्रदेश दोस्रो राष्ट्रिय कुराँश प्रतियोगितामा च्याम्पियन बनको छ । धरानमा आइतबार सम्पन्न प्रतियोगितामा १२ स्वर्ण, ६ रजत र ९ कास्य पदकसहित लुम्बिनी च्याम्पियन भएको हो ।

नेपाल कुराँश संघको आयोजनामा भएको प्रतियोगितामा विभागीय टोली नेपाली सेना दोस्रो भयो । आर्मीले ४ स्वर्ण र ३ रजत पदक जित्यो । सुदूरपश्चिम प्रदेश ३ स्वर्ण, १ रजत र ४ कास्य पदक जित्दै तेस्रो भयो ।
प्रतियोगितामा महिलातर्फ लुम्बिनीकी प्रतीक्षा केसी र  पुरुषतर्फ गण्डकीका सुजित पासवान उत्कृष्ट खेलाडी घोषित भए ।

प्रतीक्षाले महिला ५२ केजीमुनि तौलसमूहमा स्वर्ण जितेकी थिइन् । आर्मीकी उर्मिला गुरुङ रजत तथा प्रदेश–१ की स्वस्तिका मण्डल र सुदूरपश्चिमकी देविका थापा कास्य पदक जितन्। पुरुषतर्फ उत्कृष्ट सुजितले २५ केजीमुनि तौलसमूहमा रजत पदक जितेका थिए । यो तौलसमूहमा लुम्बिनीका सुमित महतोले स्वर्ण तो बागमतीका दियान तामाङ र सुवास विकले कांस्य पदक जितेका थिए ।

जुनियर महिला ४४ केजीमुनि लुम्बिनीकी दीपा खत्रीले स्वर्ण जित्ने क्रममा लुम्बिनीकै नेहा खत्रीलाई हराइन् । गण्डकीकी कमला तामाङ र प्रतीक्षा इङनामले कास्य पदक जितिन् । महिला सिनियर ५७ केजीमुनि लुम्बिनीकी अमिशा रानामगरले स्वर्ण र लुम्बिनीकै आसिका जिसीले रजत पदक जितिन् । गण्डकीकी लिला पुरी र मधेशकी अस्था राईले कास्य पदक जितिन् ।

सिनियर पुरुष ७३ केजीमुनि तौलसमूहमा आर्मीका सुनिल जिसीले स्वर्ण जिते । गण्डकीका आशिष तामाङले रजत तथा सुदूरपश्चिमका हरिगोविन्द जोशी तथा प्रदेश–१ का युनिक मेहताले कास्य पदक जिते । जुनियर महिला २५ केजीमुनि लुम्बिनीकी एन्जिला थापामगरले स्वर्ण र मधेशकी प्राप्ती रानामगरले रजत तथा प्रदेश–१ की श्रीप्रिया अग्रवाल र बागमतीकी शायरा श्रेष्ठले कास्य पदक हासिल गरिन् ।

धरान उपमहानगरपालिकाका उप मेयर आइन्द्रविक्रम बेघाले उद्घाटन गरेकाे प्रतियोगिताका विजेतालाई कोशी प्रदेशका पूर्वमुख्य मन्त्री राजेन्द्र राई र  कोशी प्रदेश खेलकुद विकास बोर्डका सदस्यसचिव हंशराज वाग्लेले पुरस्कृत गरेका थिए । समापनमा नेपाल कुराँश संघका अध्यक्ष ध्रुवराज न्यौपाने, अन्तर्राष्ट्रिय कुराँश महासंघका टेक्निकल डाइरेक्टर रवि कपुर, संघका उपाध्यक्ष तथा प्रतियोगिता संयोजक जीवन राईलगायतकोसंघ उपस्थिति थियो ।

जेठ २७ र २८ गतेसम्म सञ्चालित प्रतियोगितामा पुरूष तथा महिला दुवै तर्फ जुनियर र सिनियर गरी कुल ४ विधामा प्रतिस्पर्धा भएको प्रतियोगिता संयोजक जीवन राईले बताए।  प्रतियोगितामा सेना तथा  ६ प्रदेशका १ सय ५१  खेलाडीले ३१ स्वर्ण , ३१ रजत र ६२ कास्य पदकका लागि प्रतिस्पर्धा गरेका थिए । प्रतियोगिता अघि जेठ २६ गते अन्तर्राष्ट्रिय कुराँश महासंघका टेक्निकल डाइरेक्टर रवि कपुरले  रेफ्री सेमिनार सन्चालन गरेका थिए।