काठमाडौं (हाम्रो खेलकुद)– यसै महिना आयोजना हुने दोस्रो कृष्णप्रसाद भट्टराई स्मृति राष्ट्रिय कराते प्रतियोगिताका लागि बागमती प्रदेशबाट खेलाडी छनोट भएका छन् । महिला पुरुष कुमुते र काता गरि २१ खेलाडी छनोट भएको छनोट प्रतियोगिता आयोजक नेपाल कराते डो महासंघ चितवन शाखाले जनाएको छ ।

छनोट हुने खेलाडीमा महिला कुमुतेमा पार्वती गुरुङ (४५ केजी), सोनु श्रेष्ठ, (५० केजी), ममता गुरुङ (५५ केजी), उर्सला पहरी (६१ केजी), विनिता श्रेष्ठ (६८ केजी) र महिमा राई (६८ केजी माथि) छन् । त्यस्तै पुरुषतर्फ साइमन श्रेष्ठ (५० केजी), इलोन श्रेष्ठ (५५ केजी), मनोज गुरुङ (६० केजी), निमा शेर्पा (६७ केजी), रोशन बलामी (७५ केजी), कृष्ण चौधरी (८४ केजी) र शेखर श्रेष्ठ (८४ केजी माथि) रहेका छन् ।

महिला एकल कातामा मिरा खाती तथा टिम कातामा सन्जु देसार, नानु शाक्य र सृजना महतरा छनोट भएका छन् । त्यस्तै पुरुष एकलमा रहोन जाबेद तथा टिम कतामा राजकुमार श्रेष्ठ, अृमत थोकर र मनीष कार्की छन् । प्रदेश टोलीको प्रशिक्षकमा रामकुमार थारु र दुर्गा कुमाल तथा व्यवस्थापकमा मदन महर्जन रहेको वरिष्ठ प्रशिक्षक गगन लामा जनाएका छन् । चितवनको भरतपुरमा भएको एक दिने छनोट प्रतियोगितामा बागमती प्रदेशका १३ खेलाडीका खेलाडीको सहभागिता रहेको थियो ।

गोदावरी नगरपालिकाको आयोजना हुने कृष्ण प्रसाद भट्टराई खेल महोत्सव २०७९ को अवसरमा नेपाल कराते महासंघ जिल्ला प्रमुख डोजो ललिपतुर र गोदावरी नगरपालिकाको संयुक्त आयोजनामा माघ २६ देखि २८ गते सम्म कृष्ण प्रसाद भट्टराई स्मृति राष्ट्रिय प्रतियोगिता सञ्चालन हुनेछ ।

प्रतियोगितामा ७ प्रदेश र ३ विभागका गरि १० टोलीको सहभागिता रहनेछ । महिलातर्फ ८ र पुरुषतर्फ ९ गरि १७ तौल समूहमा प्रतिस्पर्धा हुनेछ । राष्ट्रिय खेलकुद परिषद्को विषेश सहयोगमा हुने प्रतियोगिताको सहयोगीका रुपमा सम्झना ल्याब, लि निङ, क्लासिक डायमण्ड र उद्योग वाणिज्य संघ ललितपुर रहेका छन् ।