पोखरा (हाम्रो खेलकुद)– नवौं राष्ट्रिय खेलकुद अन्तर्गत करातेमा १० टोलीका खेलाडीले प्रतिस्पर्धा गर्ने भएका छन् । पर्वतको कुस्मामा शनिबार सुरु भएको करातेमा गैर आवासिय नेपाली संघ (एनआरएनए) का खेलाडीले आयोजनास्थल नपुगेपछि १० टोलीका खेलाडीले मात्र प्रतिस्पर्धा गर्न लागेका हुन् ।

अब ७ प्रदेश, ३ विभाग त्रिभुवन आर्मी, नेपाल प्रहरी, शसस्त्र प्रहरी गरि १० टोलीका खेलाडीबीच प्रतिस्पर्धा हुने बताएको छ । एनआरएनबाट ९ खेलाडीले प्रतिस्पर्धा गर्ने गरि नाम दर्ता भएको थियो । एनआरएनबाट खेलाडीमा सन्देश लामा, कृतन महर्जन, आशिष खत्री, जमिन महर्जन, निरज राई, शेखर श्रेष्ठ, योन्जन महर्जन, प्रशन्न पोखरेल र मिना खातीको नाम दर्ता भएको थियो ।
करातेमा एकल काता, टिम काता र तौल समूह गरि १९ वटा स्वर्ण पदकका लागि प्रतिस्पर्धा हुनेछ ।

यसैबीच, एनआरएनए फुटबल टोलीबाट पहिलो खेल खेलेका ८ खेलाडीले बाँकी खेल खेल्न नपाउने निर्णय नवौंको प्राविधिक समितिले निर्णय गरेको थियो । बिहीबार भएको उद्घाटन खेलमा २–० पराजित भएपछि प्रदेश १ ले राष्ट्रिय खेलाडीसहित ८ खेलाडीले विरुद्ध प्रोटेष्ट (उजुरी) दर्ता गराएको थियो । अब टोलीमा बाकी रहेका १२ खेलाडीबाट प्रतियोगितामा भाग लिन सक्ने प्राविधिक समितिका सचिव प्रचण्ड शर्माले बताएका छन् ।