ललितपुर (हाम्रो खेलकुद)–ललितपुरको गोदावरी नगरपालिकाले दक्षिण एसियाली खेलकुद (साग) मा स्वर्ण पदक जितेका आफ्ना दुई पूर्व खेलाडीलाई चालु आर्थिक वर्षबाट आजिवन भत्ता दिन सुरुवात गरेको छ । नगरसभाले नीति तथा कार्यक्रममा सागका स्वर्ण पदक विजेतालाई मासिक ५ हजार रुपैयाँ दिने निर्णय गरेको थियो ।

गोदावरीले आठौं सागका स्वर्ण पदक विजेताद्वय दीपक श्रेष्ठ र गंगाराम महर्जनलाई भत्ता दिन सुरु गरेको हो । श्रेष्ठ र महर्जन करातेका पूर्व खेलाडी र अहिलेका प्रशिक्षक हुन् । श्रेष्ठ नवौं सागका पनि स्वर्ण पदक विजेता हुन् । श्रेष्ठ गोदावरी ११ र महर्जन १२ का स्थायी बासिन्दा हुन् । नगरले उनीहरुको भत्ता हरेक महिना बैंक खातामा पाठइदिने श्रेष्ठले जानकारी दिए ।

‘खेलकुदमा पुर्याएको योगदानका लागि नगरले गरेको सम्मानप्रति हामी आभारी छौं,’ राष्ट्रिय तथा अन्तर्राष्ट्रिय खेलाडी संघका अध्यक्ष समेत रहेका श्रेष्ठले भने,‘यसले अरु स्थानिय निकायलाई पनि आफ्ना खेलाडीलाई पुरस्कृत गर्न प्रेरणा मिलोस् भन्ने हामी चाहन्छौं ।’

५६ औं अन्तर्राष्ट्रिय साक्षरता दिवसको अवसर पारेर गोदावरीले बिहीबार आफ्ना नगरवासी पिएचडी गर्ने, एइइमा राम्रो नतिजा ल्याउने स्कुल र खेलकुदमार्फत योगदान पुर्याउनेलाई सम्मान गरेको थियो । श्रेष्ठ र महर्जन पनि सोही अवसरमा सम्मानति भएका थिए ।

गोदावरी नगरपालिका मेयर गजेन्द्र महर्जनले सम्मानित गरेका थिए । १३ औं सागका प्रशिक्षकका रुपमा देशलाई सफलता दिलाएको मा गोदावरीले श्रेष्ठ र महर्जनलाई गत वर्ष समान २ लाख रुपैयाँ पनि सम्मान गरेको थियो ।