काठमाडौं (हाम्रो खेलकुद)– बागमती प्रदेशका सन्तोष श्रेष्ठले प्रथम कृष्णप्रसाद भट्टराई स्मृति राष्ट्रिय कराते प्रतियोगिताको पुरुष ६० केजी तौल समूहमा स्वर्ण पदक जितेका छन् ।

ललितपुर सातदोबाटोस्थित कराते हलमा जारी प्रतियोगिताको दोस्रो दिन शुक्रबार विभागिय टोलीको दबदबाकाबीच सन्तोषले बागमतीका लागि पहिलो स्वर्ण पदक जितेका हुन् । सन्तोषले फाइनलमा सुदूरपश्चिमका रोशन भाटलाई १०–२ ले हराएका हुन् ।

विवेक थापालाई पहिलो खेलमा ८–० ले हराएका सन्तोषले सेमिफाइनलमा मधेश प्रदेशका सरोज पासवालनलाई ६–५ ले पराजित गरे । नेपाल पुलिस क्लबका राजीव पुडासैनीबाट वाकओभर पाएका हराएका रजत पदक विजेता रोशनले सेमिफाइनलमा लुम्बिनी प्रदेशका सनमराज घर्तिमगरलाई ११–६ हराएका थिए । सनमराज र सरोजले कास्य पदक प्राप्त गरेका छन् ।

१७ वटा इभेन्टमा अहिले सम्म ११ वटा स्वर्ण पदकको छिनोफानो हुँदा पुलिसले सर्वाधिक ५, आर्मी र एपिएफले समान २ तथा प्रदेश १ र बागमती प्रदेशले समान १ स्वर्ण पदक जितेका छन् । नेपाल लोकतान्त्रिक खेलकुद संघ र ललिलपुर जिल्ला प्रमुख डोजोको संयुक्त आयोजनामा भएको प्रतियोगितालाई राष्ट्रिय खेलकुद परिषद् (राखेप) र नेपाल कराते महासंघले १९ औं एसियाली खेलकुदको प्रारम्भिक छनोटको मान्यता दिएको छ ।

शनिबार सम्म चल्ने प्रतियोगितामा ७ प्रदेश, ३ विभाग (सेना, प्रहरी र एपिएफ) का २ सय १० खेलाडीको सहभागिता रहेको छ । महिलातर्फ ८ र पुरुषतर्फ ९ इभेन्ट्समा २१ स्वर्ण, २१ रजत र ४२ कास्य पदकका लागि प्रतिस्पर्धा हुनेछ । प्रतियोगितालाई सम्झना ल्याबले मुख्य प्रायोजन गरेको छ । लिनिङ र सान सोजु सह प्रायोजक रहेको प्रतियोगितालाई ललितपुर महानगरपालिका, गोदावरी नगरपालिका,बागमती गाउँपालिका र क्लासिक डायमण्ड सहयोगकी रुपमा रहेका छन् ।