काठमाडौं (हाम्रो खेलकुद) – १३ औं दक्षिण एसियाली खेलकुद (साग) की स्वर्ण पदक विजेता एपिएफकी अनुपमा मगरले प्रथम कृष्णप्रसाद भट्टराई स्मृति राष्ट्रिय कराते प्रतियोगिताको महिला ६८ केजी माथिको तौल समूहमा स्वर्ण पदक जितेकी छन् ।

ललितपुर सातदोबाटोस्थित कराते हालमा जारी प्रतियोगिताको दोस्रो दिन शुक्रबार त्रिभुवन आर्मी क्लबको सनी तामाङलाई १०–६ ले हराउँदै च्याम्पियन बनेकी थिइन् । दुई वर्षअघि स्वदेशमा भएको सागमा अनुपमाले स्वर्ण पदक जितेकी थिइन् । जारी प्रतियोगितामा एपिएफको स्वर्ण संख्या दुई पुगेको छ । अर्को विभागिय टोली नेपाल पुलिसले ५ र आर्मीले २ र प्रदेश १ ले एक स्वर्ण पदक जितेको छ ।

अनुपमाले पहिलो खेलमा मधेश प्रदेशी परिना शाही ठकुरीलाई १२–७ ले र सेमिफाइन्लमा पुलिसकी एरिका गुरुङलाई ७–६ ले हराएकी थिइन् । अन्तिम सेकेन्डमा १ अंक जोड्दै अनुपमाले फाइनल यात्रा तय गरेकी थिइन् । रजत विजेता सनीले पहिलो खेलमा लुम्बिनीकी प्रतीक्षा रानालाई ९–० र सेमिफाइनलमा बागमतीकी सानिया मोक्तानलाई २–० ले हराएकी थिइन् । एरिका र सानियाले कास्य पदक प्राप्त गरे ।

नेपाल लोकतान्त्रिक खेलकुद संघ र ललिलपुर जिल्ला प्रमुख डोजोको संयुक्त आयोजनामा भएको प्रतियोगितालाई राष्ट्रिय खेलकुद परिषद् (राखेप) र नेपाल कराते महासंघले १९ औं एसियाली खेलकुदको प्रारम्भिक छनोटको मान्यता दिएको छ । शनिबार सम्म चल्ने प्रतियोगितामा ७ प्रदेश, ३ विभाग (सेना, प्रहरी र एपिएफ) का २ सय १० खेलाडीको सहभागिता रहेको छ ।

महिलातर्फ ८ र पुरुषतर्फ ९ इभेन्ट्समा २१ स्वर्ण, २१ रजत र ४२ कास्य पदकका लागि प्रतिस्पर्धा हुनेछ । प्रतियोगितालाई सम्झना ल्याबले मुख्य प्रायोजन गरेको छ । लिनिङ र सान सोजु सह प्रायोजक रहेको प्रतियोगितालाई ललितपुर महानगरपालिका, गोदावरी नगरपालिका,बागमती गाउँपालिका र क्लासिक डायमण्ड सहयोगकी रुपमा रहेका छन् ।