काठमाडौं (हाम्रो खेलकुद)– १३ औं दक्षिण एसियाली खेलकुद (साग) की स्वर्ण पदक विजेता नेपाल पुलिस क्लबका बिप्लवलाल श्रेष्ठ प्रथम कृष्णप्रसाद भट्टराई स्मृति राष्ट्रिय कराते प्रतियोगिताको ८४ केजीमाथिको तौल च्याम्पियन बनेका छन् ।

ललितपुर सातदोबाटोस्थित कराते हालमा जारी प्रतियोगिताको दोस्रो दिन शुक्रबार बिप्लवले बागमती प्रदेशका आशिष थापालाई ६–२ ले हराउँदै स्वर्ण पदक जितेका हुन् । दुई वर्षअघि स्वदेशमै भएको १३ औं सागमा बिप्लवले ८४ केजी माथीकै तौल समूहमा स्वर्ण पदक जितेका थिए ।

रजत पदकमा सिमित भएका आशिषले सानदार प्रदर्शनका साथ फाइनल यात्रा तय गरेका थिए । एपिएफका दिगम्बरप्रसाद पन्दलाई हराउँदै आशिषले सेमिफाइनल यात्रा तय गरेका थिए । १०–९ ले पछि परेको अवस्थामा अन्तिम सेकेन्डमा स्कोर गर्दै आशिष अघि बढेका थिए । अन्त्यमा स्कोर बराबरी हुँदा पहिला स्कोर गरेको आधारमा आशिष अन्तिम चारमा पुगेका थिए । अर्को खेलमा सागर राउतलाई १३–६ ले हराउँदै आशिषले बिप्लवसँगको भेट पक्का गरेका थिए ।

पहिलो खेलमा गण्डकी प्रदेशका किरण महतोलाई ५–० ले हराएका बिप्लबले सेमिफाइनलमा त्रिभुवन आर्मी क्लबका विपिनराज सिंह दर्जीलाई ९–६ ले पराजित गरेका थिए । बिप्लवको जिपछि जारी प्रतियोगितामा पुलिसको स्वर्ण पदक संख्या ४ पुगेको छ । त्यस्तै एपिएफ, प्रदेश १ र आर्मीले समान १ स्वर्ण पदक जितेका छन् । १३ औं सागकी स्वर्ण पदक विजेता कुसुम खड्काले प्रतियोगिताको ४५ केजी तौल समूहमा स्वर्ण पदक जित्दै स्वर्ण पदकमा आर्मीको खाता खोलेकी थिइन् ।

नेपाल लोकतान्त्रिक खेलकुद संघ र ललिलपुर जिल्ला प्रमुख डोजोको संयुक्त आयोजनामा भएको प्रतियोगितालाई राष्ट्रिय खेलकुद परिषद् (राखेप) र नेपाल कराते महासंघले १९ औं एसियाली खेलकुदको प्रारम्भिक छनोटको मान्यता दिएको छ । शनिबार सम्म चल्ने प्रतियोगितामा ७ प्रदेश, ३ विभाग (सेना, प्रहरी र एपिएफ) का २ सय १० खेलाडीको सहभागिता रहेको छ ।

महिलातर्फ ८ र पुरुषतर्फ ९ इभेन्ट्समा २१ स्वर्ण, २१ रजत र ४२ कास्य पदकका लागि प्रतिस्पर्धा हुनेछ । प्रतियोगितालाई सम्झना ल्याबले मुख्य प्रायोजन गरेको छ । लिनिङ र सान सोजु सह प्रायोजक रहेको प्रतियोगितालाई ललितपुर महानगरपालिका, गोदावरी नगरपालिका,बागमती गाउँपालिका र क्लासिक डायमण्ड सहयोगकी रुपमा रहेका छन् ।