सुर्खेत (हाम्रो खेलकुद) – सुर्खेत प्रथम प्रदेश स्तरीय तेक्वान्दो प्रतियोगितामा च्याम्पियन बनेको छ । १४ स्वर्ण, ६ रजत र ४ कास्य पदकसहित सुर्खेत च्याम्पियन बनेको हो ।

रुकुम ४ स्वर्ण, २ रजत र २ कास्य पदकका साथ दोस्रो तथा सल्याण १ स्वर्ण, १ रजत र एक कास्य पदक जित्दै तेस्रो स्थानमा रहेको थियो । प्रदेशमा च्याम्पियन बनेका खेलाडीले पुस १५ देखि १७ गते सम्म काठमाडौंमा आयोजना हुने प्रथम मेयर कप राष्ट्रिय प्रतियोगितामा भाग लिने प्रशिक्षक भुवन थापाले जानकारी दिए । प्रदेशमा तेक्वान्दो खेलको विकासका लागि प्रदेश तथा स्थानिय सरकारले पनि प्रतियोगिता आयोजना गर्नुपर्नेमा तेक्वान्दो संघ कर्णाली प्रदेशका अध्यक्ष लक्ष्मण कडेलले जोड दिए ।

राष्ट्रिय खेलकुद परिषद् राखेप कार्यकारी बोर्ड केन्द्रीय सदस्य नन्दा बस्यालले ‘स्वास्थ्यका लागि खेलकुद राष्ट्रका लागि खेलकुद’ भए जस्तै अव ‘महिलाका लागि खेलकुद’ भन्ने नाराका साथ खेललाई अगाडि बढाउने बताएकी छिन । कर्णालीमा खेल विकासका लागि तेक्वान्दो खेल जरुरी हुनुका साथै प्रदेश स्तरीय मात्र नभएर राष्ट्र तथा अन्तराष्ट्रिय प्रतियोगिता प्रदेशमै गरिने पनि उनले जानकारी दिइन् ।

कर्णाली प्रदेश तेक्वान्दो संघ वीरेन्द्रनगरको आयोजनामा तीन दिन सम्म चलेको प्रतियोगितामा कर्णाली प्रदेशका पाँच जिल्ला सुर्खेत, दैलेख, सल्यान, रुकुम पश्चिम र जुम्लाका झण्डै ३ सय खेलाडी सहभागी भएका थिए । समापनमा कर्णाली प्रदेशका उपाध्यक्ष प्रमोद हमाल,सुर्खेत जिल्लाका प्रशिक्षक भुवन थापा, जिल्ला खेलकुदका अध्यक्ष चन्द्र कुमार गिरीलगायतको उपस्थिति थियो ।