मस्को (एजेन्सी) – डिफेन्डिङ च्याम्पियन जर्मनीले अबको १७ दिनपछि सुरु हुने विश्व फुटबलको महाकुम्भ फिफा विश्वकप २०१८ मा उपाधि रक्षासहित यात्रा सुरु गर्नेछ । पछिल्लो विश्वकप उपाधि जितेको जर्मनीले यसअघिको फिफा कन्फेडेरेसन कप पनि जितेको थियो ।

यसपटक जर्मनीको टोली छनौटका क्रममा प्रशिक्षक जोकिम लोले निकै दवाव खेप्नु पर्यो । केहि खेलाडी चोटका कारण मैदान बाहिर रहेका कारण ति खेलाडीललाई टोलीमा राख्ने वा नराख्ने बारे दुविधा रहयो । अन्त्यमा लोले पूर्ण फिट नभएपनि जेरोम बोटेङ र म्यानुएल नोयरलाई टोलीमा राखे ।

कुल ३२ राष्ट्र सम्मिलित छन् । प्रतियोगिताको प्रत्यक समूहमा चार टोली छन् र समूह चरणका खेलपश्चात शीर्ष २ टोली राउन्ड अफ १६ मा प्रवेश गर्नेछन् ।

प्रतियोगितामा सहभागी ३२ मध्ये २० टोलीले यसअघिको संस्करणमा पनि सहभागिता जनाएका थिए । यसपटक विश्वकपमा दुई टोलीले पहिलोपटक सहभागिता जनाउँदै छन् । आइसल्याण्ड र पानामाको यो पहिलो विश्वकप यात्रा हो । ११ सहरका १२ रंगशाला प्रयोग हुने प्रतियोगिताको फाइनल खेल जुलाई १५ तारिखमा मस्कोको लुझिन्की रंगशालामा हुनेछ ।

१४ जुनबाट सुरु हुने प्रतियोगितामा कुल  ६४ खेल खेलिनेछ । प्रतियोगिताको आधिकारिक बल एडिडासले उत्पादन गर्नेछ । यसपटक एडिडासले सन् १९७० को विश्वकपलाई आधार मानेर तेल्स्टार १८ नामक बल प्रयोग गर्नेछ ।