कपिलवस्तु (हाम्रो खेलकुद) – कुँवरवर्ती इंग्लिस बोर्डिङ स्कुल मणिग्रामले तेस्रो उपमेयर कप रनिङ शिल्ड खुल्ला महिला भलिबल प्रतियोगिताको उपाधि जितेको छ ।

कुँवरवर्ती स्कुलको कोर्टमा आइतबार भएको फाइनलमा कुँवरवर्तीले एभरेस्ट मावि बुटवललाई ३-० का सोझो सेटमा पराजित गर्दै लगातार तेस्रो सिजन उपाधि जित्दै रनिङ शिल्ड क्लिनसवीप गरेको छ । सुरुवाती दुई संस्करणमा पनि कुँवरवर्ती नै च्याम्पियन बनेको थियो । यसपटक कुँवरवर्तीले काठमाडौंको न्यु डायमन्ड एकेडेमीको खेलाडीलाई कोर्टमा उतारेको थियो ।

प्रतिस्पर्धात्मक र रोमाञ्चक बनेको खेलमा कुँवरवर्तीले पहिलो सेट २५-२२ ले आफ्नो पक्षमा पारेको थियो । दोस्रो र तेस्रो सेट पनि कुँवरवर्तीले समान २५-२३ र २५-२३ ले आफ्नो पक्षमा पार्दै उपाधि जित्न सफल भयो ।

उपाधिसँगै कुँवरवर्तीले ६१ हजार रुपैयाँसहित शिल्ड र ट्रफी हात पारेको छ । दोस्रो भएको एभरेस्टले ४१ हजार रुपैयाँ प्राप्त गरेको छ । तेस्रो भएको कुँवरवर्तीको ‘बी’ टोलीले २१ हजार र चौथो भएको न्यु होराइजनले ११ हजार रुपैयाँ हात पारेको नगर खेलकुद विकास समिति तिलोत्तमाका सदस्य दीपक खनालले जानकारी गराए ।

कुँवरवर्तीकी झरना श्रेष्ठ प्रतियोगिताको सर्वोत्कृष्ट खेलाडी घोषित भइन् । एभरेस्टकी भावना डाँगी उत्कृष्ट स्पाइकर, कुँवरवर्ती ‘बी’ टिमकी कल्पना सिन्जाली सर्भर, एभरेस्टकी जस्ना महतो सेटर र कुँवरवर्तीकी वालमिका आचार्य उत्कृष्ट ब्लकर तथा कुँवरवर्तीर्क एन्जिला प्रधान उत्कृष्ट डिफेन्स चुनिइन् ।

कुँवरवर्तीकै कुमार राई उत्कृष्ट प्रशिक्षक चुनिए । कुँवरवर्तीकी प्राश्ना खनाल उदियमान खेलाडी तथा न्यु होराइजनकी सन्जिता चौधरी अनुशाषित खेलाडी चुनिइन् । उनीहरु सबैले ट्रफी र नगद पुरस्कार हात पारे ।

नगर खेलकुद विकास समिति तिलोत्तमा आयोजना तथा कुँवरवर्ती इंग्लिस बोर्डिङ स्कुलको संयोजनमा शुक्रबारदेखि भएको प्रतियोगितामा ९ टोलीको सहभागिता रहेको थियो । खेल लिग कम नकआउटको आधारमा भएको थियो ।