काठमाडौं (हाम्रो खेलकुदए– सोलुखुम्बुका सुमन कुलङ राई र महिलातर्फ धादिङकी रसिला तामाङले चौँथो पाँचपोखरी विन्टर ट्रेल हाफ म्याराथनको उपाधि जितेका छन् ।

सिन्धुपाल्चोकको पाँचपोखरी थाङपाल गाउँपालिकाको ४ हजार २ सय मिटर उचाईको पाँचपोखरीमा भएको म्याराथन १ घण्टा ५५ मिनेट ५२ सेकेण्ड मा पूरा गर्दै सुमनले उपाधि जितेका हुन् । रसिलाले २ घन्टा ४४ मिनेट ४३ सेकेन्डमा दौड पूरा गरेकी थिइन् ।

नेपाली सेनाका गोपाल तामाङ दोस्रो र श्रीकास राई तेस्रो भए । गोपाल तामाङले २ घण्टा २९ सेकेण्ड र श्रीकाले २ घण्टा १ मिनेट ४० सेकेण्डमा दौड पूरा गरेका थिए । सिन्धुपाल्चोकी नितु तामाङले २ घन्टा ४६ मिनेट २५ सेकेण्डमा दौड पूरा गर्दै महिलातर्फ दोस्रो भइन् । प्यूठानकी संगिता बुढामगर तेस्रो, आश्मा विश्वकर्मा चौथो र निर्मला राई पाँचौं भइन् । महिला र पुरुषतर्फका विजेताले उपाधिसहित समान सुमनले ५० हजार, दोस्रोले ३० र तेस्रोले २० हजार रुपैयाँ प्राप्त गरे ।

सिन्धुपाल्चोकका सहभागितर्फ पुरुषमा संच तामाङ र महिलामा नितु तामाङ विजयी भए । भेट्रान पुरुषतर्फ गोर्खाका भिम बहादुर गुरुङ र महिलामा राधा श्रेष्ठ पहिलो भएका छन । सहभागी खेलाडीको हौसला बढाउन दक्षिण एसियाली खेलकुद (साग) का कीर्तिमानी धावक बैकुण्ठ मानन्धर पनि सहभागी थिए ।

बागमती प्रदेश खेलकुद विकास परिषद्का सदस्य सचिव सूर्यलाल भण्डारी, कीर्तिमानी धावक मानन्धर लगायतले विजेता खेलाडीलाई पुरस्कृत गरेका थिए । बागमती प्रदेश खेलकुद विकास परिषद् र पाँचपोखरी थाङपाल गाउँपालिका खेलकुद विकास समितिको साझेदारी तथा नेपाल एथ्लेटिक्स संघको समन्वयमा प्रतियोगिता आयोजना भएको थियो ।