काठमाडौं (हाम्रो खेलकुद) – नेपाल प्रहरी विद्यालयका पूर्व विधार्थीहरु २०७१ को ब्याचले फुटबल प्रतियोगिताको उपाधि जितेको छ । आयोजक समेत रहेको २०७१ को ब्याचले बुधबार भएको फाइनलमा २०६८ को ब्याचलाई ३–२ ले हराउँदै उपाधि जितेको थियो ।

बुढानिलकण्ठ पासिकोटस्थित फुटसलमा भएको फाइनलमा साइरस रिमालको कप्तानीमा रहेको ब्याच २०७१ का लागि राहुल खड्काले २ र विवेक बुढाथोकीले १ गोल गरे । २०६८ का सन्तोष खत्री र कप्तान समेत रहेका विक्रान्त नरसिंह राणाले गोल गरेका थिए । उपाधिसहित २०७१ ले १३ हजार रुपैयाँ दोस्रो टोलीले ६ हजार रुपैयाँ प्राप्त गर्यो । एक दिने प्रतियोगितामा १३ टोलीको सहभागिता रहेको थियो ।

प्रहरी विद्यालयका प्रधानाध्यापक सन्जीव घिमिरे, क्याम्प कमान्डर डिएसपी सूर्यबहादुर खड्काले विजेता, उपविजेता टोलीलाई पुरस्कृत गरेका थिए । पूर्व खेलाडी जेविश पाण्डेको पनि कार्यक्रममा उपस्थिति थियो । जेविश सम्मलित २०६० ब्याच प्रतियोगिताको सेमिफाइनल पुगेको थियो ।

पूर्व विधार्थीहरुबीच फुटसल आयोजना गरे भाइचाराको सम्बन्ध अझै प्रगाढ हुने विश्वास लिएको आयोजक २०७१ ब्याचका सविन जमरकट्टेलले बताए । सबै भन्दा पुरानो ब्याचका रुपमा रहेको २०६० का अनिल जोशीले नयाँ र पुराना विधार्थीबीच परिचय हुने र त्यसले भावनात्मक सम्बन्धको विकास हुने बताए । प्रधानाध्यापक घिमिरे र क्याम्प कमाण्डर खड्काले यस्ता प्रतियोगिता निरन्तरत रुपमा आयोजना हुने पर्ने बताए ।