काठमाडौं (हाम्रो खेलकुद) – नेपाल पावर लिफ्टिङ संघको आयोजनामा रुप कार्की स्मृति दोश्रो नेपाल्स स्ट्रोङगेस्ट पावर लिफ्टिङ प्रतियोगिता माघ अन्तिम साता आयोजना हुने भएको छ ।

‘स्वस्थ शरीर भित्र स्वस्थ मस्तिष्क’ भन्ने नाराका साथ २८ माघदेखि आयोजना हुन लागेको प्रतियोगितामा पुरुष ६, महिलामा ३ र मास्टर्स ४५ वर्षमाथि १ तौल समूहमा गरी जम्मा १० स्पर्धामा प्रतिस्पर्धा हुने आयोजक समितिका सचिव सुरेश सुवेदीले जनाएका छन् । हरेक स्पर्धामा शीर्ष तीन स्थान हात पार्ने खेलाडीले क्रमशः १० हजार, ५ हजार र ३ हजार नगद पुरस्कार प्राप्त गर्ने छन् ।

पुरुष-महिलाको प्रत्येक तौलसमूह प्रथम हुने खेलाडीबीच पुनः ओभरअल च्याम्पियनका लागि प्रतिस्पर्धा गराइने छ । ओभरअल च्याम्पियनलाई उपाधिसंगै छुट्टै जनही ५१ हजार नगदबाट पुरस्कृत गरिने छ ।

विजेता खेलाडीलाई अन्तर्राष्ट्रिय सहभागिताका लागि समन्वय गर्ने सचिव सुवेदीले जानकारी गराए । गत संस्करणको पुरुषमा सुकदेव कार्की तथा महिलामा ज्योति थापा ओभरअल च्याम्पियन बनेका थिए । प्रतियोगितामा करिब १ सय ५० खेलाडीको सहभागिता रहने आयोजकले जनाएको छ ।

दुईदिने प्रतियोगिताका खेलहरु त्रिपुरेश्वरस्थित राष्ट्रिय खेलकुद परिषद्को कभर्डहलमा खेलाइने छ । लामो समय अमेरिकामा बसेका स्व. कार्की पावर लिफ्टिङको आफ्नो उमेर समूहका विश्व च्याम्पियन हुन् । नेपालमा रहेकै बेला उनको निधन भएको थियो ।