काठमाडौं (हाम्रो खेलकुद) – विवादित एउटा पक्षको असहमतिका वावजुद नेपाली क्रिकेटको आन्तरिक विवाद समाधानका लागि गठित विवाद समाधान समितिको पहिलो पटकले पदीय जिम्मेवारी तोक्ने क्रममा दुईजना संयोजक बनाइएको छ । नेपाल सरकार सहमतिमा गठन भएको समितिको बैठक बस्न भने दुई महिनाको समय लागेको छ ।

अन्तर्राष्ट्रिय क्रिकेट परिषद् (आइसिसी) का एसोसिएट सदस्य राष्ट्र निर्देशक इरान ख्वाजा र फाइनान्स मेनेजर अमर सेखको उपस्थितिमा मंगलबारको नेपाल क्रिकेट संघ (क्यान) का पूर्व अध्यक्ष विनयराज पाण्डेलाई संयुक्त रुपमा संयोजक तोकिएको हो । त्यस्तै राष्ट्रिय टोलीका पूर्व कप्तान एवं क्रिकेट खेलाडी संघका अध्यक्ष पवन अग्रवाललाई सचिव तथा राष्ट्रिय खेलकुद परिषद (राखेप) का प्रेस सल्लाहकार रोहित दाहाललाई प्रवक्ताको जिम्मेवारी पाएका छन् । युवा तथा खेलकुद मन्त्रालयका सहसचिव चुणामणी पौडेल र क्यानका पूर्व कार्यवाहक अध्यक्ष दीपक कोइराला समितिको सचिव छन् । क्यानको पछिल्लो विवाद सुरु भएको बर्षदिनमा क्यान प्रतिबन्धमा परेको छ भने नेपाली क्रिकेटकर्मी अलग अलग खेलमामा विभाजित भएका छन् । समितिबाट पनि विवाद निस्कन्छ भन्नेमा शंका यथावत छ ।
समितिमा क्यानको निर्वाचित समितिको प्रतिनिधित्व छैन । मंसिरको अन्त्यमा क्यानको साधारण सभाले चन्दको नेतृत्वमा कार्यसमिति चयन गरेपनि त्यसलाई विधान विपरित भन्दै राखेपले पुसमा रमेश सिलवालको अध्यक्षतामा क्यानको तदर्थ समिति गठन गरेपछि नेपाली क्रिकेटमा ध्रुबिकरण भएको थियो । त्यसपछि निर्वाचित समितिले बैधानिकताको विवाद टुंगाउन सर्वोच्च अदालतमा दायर गरेको मुद्दा विचाराधिन छ । यहि विवादलाई टेक्दै आइसिसीले वैशाख १३ गते क्यानलाई निलम्बन गरेको थियो ।
संयोजक मध्येका एक पाण्डेले काम गर्ने वातावरण बनेको उल्लेख गर्दै भने ‘जुनसम्ममा निर्वाचन भएन भने नेपालको आइसिसी सदस्यता नै खारेज पनि हुन सक्छ । निलम्बनको अवधिमा पनि क्रिकेट विकासको लागि सरोकारवालाहरु गम्भिर र सकारात्मक देखिएनन् भने सदस्यता खारेज गर्न सक्छ । क्रिकेट विवाद समाधानका लागि यो एउटा राम्रो मौका हो ।’
निर्वाचित क्यानका महासचिव अशोकनाथ प्याकुरेलेले सल्लाकार समितिबाट विवाद समाधान नहुने बताएका छन् । उनले भने,‘अहिले भइरहेको कामले केही निकास दिदैन हामी कानुनी लडाईमा छौं । सुरुबाटै हाम्रो असहमति छ । त्यसैले आइसिसी प्रतिनिधिको उपस्थितिमा बैठक हुनु वा अरु केही हुनुमा हाम्रो चासो छैन ।’
समितिको बैठक बसेपनि आन्तरिक क्रिकेट कसरी अघि बढ्छ भन्ने ठोस निर्णय हुन सकेन । आइसिसीकै सक्रियतामा नेपालले अन्तर्राष्ट्रिय प्रतियोगिता भाग लिदै आएको छ ।