पोखरा (हाम्रो खेलकुद) – पोखरा अन्तर्राष्ट्रिय म्याराथनको आयोजक संस्था नेपाल भूतपूर्व खेलाडी मञ्चले पुरस्कार राशीमा सतप्रतिशत वृद्धि गरेको छ । मञ्चले बुधबार पोखरामा पत्रकार सम्मेलनको आयोजना गर्दै म्याराथनको पुरस्कार राशिमा वृद्धि गरेको जनाएको छ ।

वृद्धि भएको पुरस्कार राशि अनुसार म्याराथनको विजेताले ४ लाख रुपैयाँ हात पार्नेछ । जुन गतवर्षको भन्दा दोब्बर हो । दोश्रो पुरस्कार २ लाख, तेश्रो हुनेले १ लाख र सान्त्वनाले ३० हजार रुपैयाँ प्राप्त गर्नेछ ।

आगामी फागुन १९ गते पोखरामा आयोजना हुने १६औं संस्करणको पोखरा म्याराथनतर्फ हुने २१ किमि महिला हाफ म्याराथन बाहेक महिला पुरुष १० किमि र छात्र-छात्रा ५ किमि, ह्विल चियर तथा दृष्टिविहिन दौडतर्फ समेत पुरस्कार रकम बढाइएको जनाइएको छ । ति दौडतर्फ समेत ५–५ हजार वृद्धि गरिएको छ ।

मञ्चका अध्यक्ष हरि प्रसाद पराजुलीले सबै विधातर्फ गरी कुल २८ जना पुरस्कृत हुने जानकारी गराउँदै पुरस्कार राशी गत वर्षको भन्दा ४ लाख बढेको रहेको बताए । यो वर्ष पुस्कार राशिमा १२ लाख ३० हजार रुपैयाँ खर्च हुनेछ ।

सफल दुध मुख्य प्रायोजक

पोखराको प्रतिष्ठित घराना लक्ष्मी ग्रुप अन्तर्गतको उद्योग सुजल डेरीको मुख्य उत्पादन सफल दुधले पोखरा अन्तर्राष्ट्रिय म्याराथनलाई मुख्य प्रायोजनको भूमिकामा निरन्तरता दिएको छ । विगत ६ वर्ष देखि निरन्तर रुपमा पोखरा म्याराथनसँग सहकार्य गर्दै आएको सफल दुधले आगामी ३ वर्षका लागि मुख्य प्रायोजकका रुपमा सम्झौता नविकरण गरेको छ ।

उद्योगका निर्देशक सुनिल श्रेष्ठ र मञ्चका अध्यक्ष पराजुलीले सम्झौता–पत्र आदान प्रदान गरे । सो अवसरमा उद्योगका निर्देशक श्रेष्ठले पोखरा म्याराथन सँग सम्झौता गर्न पाउनु सुखद रहेको बताउँदै पोखरालाई म्याराथनको माध्यमबाट विश्वमा परिचित गराउने संगै पोखरालाई खेलकुद पर्यटनको राजधानीका रुपमा स्थापित गर्न उद्योगले सानो सहयोग गरेको उल्लेख गरे ।