पञ्चपुरीलाई काँक्रेविहार गोल्डकप उपाधि

सुर्खेत (हाम्रो खेलकुद) – पञ्चपुरी नगरले काँक्रेविहार गोल्डकप फुटबल प्रतियोगिताको उपाधि जितेको छ । वीरेन्द्रनगरस्थित रंगशालामा आइतबार भएको फाइनल खेलमा विवादका कारण स्थगित भएपछि सोमबार टाइब्रेकरबाट उपाधिको छिनोफानो गरिएको थियो ।

आइतबार खेल स्थगित हुँदा १–१ को बराबरी भएको थियो । खेलको १२ औं मिनेटमा वीरेन्द्रनगरले गोल गर्दै अग्रता लिएको थियो । अन्त्यतिर प्राप्त पेनाल्टीमा गोल गर्दै पञ्चपुरीले बराबरी गरेको थियो । त्यो पेनाल्टी दिने निर्णय गलत भएको भन्दै वीरेन्द्रनगरले आपत्ती जनाएपछि उत्पन्न विवादका कारण आयोजकले खेल स्थगित गरेको थियो ।

आयोजकले सोमबार बिहान पत्रकार सम्मेलमार्फत दुई पक्षबीच अघिल्लो दिनको १–१ को नजितालाई स्वीकार गर्दै पेनाल्टी सुटआउटमा उपाधि छिनोफानो गर्ने सहमति भएको जनाएको थियो । त्यसपछि भएको पेनाल्टीमा पञ्चपुरी ५–४ ले नतिजा आफ्नो पक्षमा पारेको थियो ।

उपाधिसहित पञ्चपुरीले १ लाख र वीरेन्द्रनगरले ५० हजार रुपैयाँ प्राप्त गर्यो । काँक्रेविहान क्लबको आयोजनामा बुधबार देखि सुरु भएको प्रतियोगितामा सुर्खेत जिल्लाका ९ पालिकाको सहभागिता थियो ।