काठमाडौं (हाम्रो खेलकुद) – ऋतिक राणा र आरभ सम्राट हाडा गणेशमान सिंह राष्ट्रिय टेनिस प्रतियोगिताको पुरुष एकलतर्फ फाइनलमा प्रवेश गरेका छन् ।

सातदोबाटोस्थित टेनिस कोर्टमा सोमबार भएको सेमिफाइनलमा राणाले अकि जुवेन राउतलाई ६–२, २–६ र ६–३ ले तथा आरभले निशान श्रेष्ठलाई ६–१ र ६–२ ले पराजित गर्दै उपाधिनजिक पुगे ।

यस्तै महिला एकलतर्फ प्रेरणा कोईराला र सलोनी तामाङले फाईनल यात्रा तय गरिन् । प्रेरणाले रयना शाहलाई ६–१ र ६–३ ले तथा सलोनीले अभिलाषा बिष्टलाई ६–१ र ६–० ले पाखा लगाइन् । महिला युगलतर्फ ईरा राउत र अभिलाषा बिष्टको जोडीले प्रेरणा कोईराला र सलोनी तामाङको जोडी लाई ५–७, ६–४ र ७–५ ले पराजित गर्दै च्याम्पियन बनिन् ।

जुनियर यु–१० छात्रातर्फ सिभाली गुरुङले आयुषा जिसीलाई ६–१, ६–० ले पराजित गर्दै उपाधि जितिन् । यु–१४ तर्फ सुनिरा थापाले अद्या पौडेललाई ६–३, ६–२ ले पराजित गर्दै उपाधि हात पारिन् । सुनिरा थापाले युग तर्फको उपाधी पनि जितिन् ।

उनले प्रशंसा मोक्तानसँग मिलेर आद्या पौडेल र समृद्धी महर्जनको जोडीलाई ७–५, ७–६ को कठिन जित निकालिन् । छात्र यु–१४ युगलतर्फको प्रतिस्पर्धामा आयुष्मान हजुर घले र सक्षम विक्रम शाहको जोडीले दर्शिल श्रेष्ठ र श्रीजन भट्टराईको जोडीलाई ६–२, ६–१ ले पराजित गर्दै उपाधि जिते ।

पुरुष ६५ बर्षमाथि विदुर बिष्टले ज्ञानेन्द्र ताम्राकारलाई पराजित गर्दै विदुरले उपाधि जिते । ५५ वर्षमाथि कमल थापालाई ६–४ र ६–३ ले पराजित गर्दै विमल कुमार गुरुङले उपाधि जिते । यस्तै ३५ बर्षमाथि कमल बहादुर भण्डारीले सिमान्त गुरुङलाई हराउँदै उपाधि जिते । पुरुष युगल ३५ बर्ष माथिको युगल तर्फ कमल बहादुर भण्डारी र सिमान्त गुरुङ्गको जोडी तथा निरज थापा र लोक गुरुङ्गको जोडीले फाईनल यात्र तय गरे ।

कमल र सिमान्तको जोडीले राजु क्षेत्री र सुदर्शन श्रेष्ठको जोडीबाट वाक ओभ र प्राप्त गरे भने निरज र लोकको जोडीले राजन पौडेल र नविन श्रेष्ठको जोडीलाई ६–३, ६–३ को सेटमा पराजित गर्दै उपाधी भिडन्त पक्का गरेका हुन् ।

४५ बर्ष माथिको पुरुष युगलमा राजु श्रेष्ठ र महेश श्रेष्ठको जोडी र चन्द्र शाही र देगेन्द्र श्रेष्ठको जोडीले फाइनल खेल्ने भएका छन् । ५५ बर्ष माथि कृष्णराज घले र सुवर्ण धाख्वाको जोडी र कमल थापा र छम्ब धोन्दुप भिड्नेछन् । समापन मंगलबार हुनेछ ।