कैलाश कपमा आयोजकका दुवै टोली विजयी

भरतपुर – कैलाश कप सेभेन ए साइड फुटबलमा कालिका ८, गैरिबारी, आयोजक कैलाश युथ क्लब ए, बी, युनिक एफसी बी र खेतबारी एफसी विजयी भएका छन् ।

भरतपुर ११ स्थित कैलाश क्लबको मैदानमा भएको पहिलो खेलमा कालिका ८ गैरिवारीले युनिक एफसीलाई १–० ले पराजित गर्यो । दोस्रो खेलमा आयोजक कैलाश युथ क्लब ’ए’ ले फ्रेण्ड्ली फुटबल क्लब माडीलाई २–१ ले हरायो । आयोजकलाई जित दिलाउन दुवै गोल कृष्ण गुरुङले गरे ।

आजको तेस्रो खेलमा खेतबारी एफसीले अकलादेवी एफसी दासढुंगालाई २–० ले पराजित गरेको छ । खेतबारीको जितमा दुवै गोल आशिष गजुरेलले गरे । चौथो खेलमा युनिक एफसी ’बी’ ले साहारा क्लब मनहरीलाई ३–० ले पाखा लगायो ।

पाँचौ तथा अन्तिम खेलमा आयोजक कैलाश युथ क्लब ’बी’ ले भरतपुर ६ लाई १–० ले पाखा लगायो । कैलाशको जितमा सविन क्षेत्रीले गोल गरे ।
प्रतियोगितामा आइतबार समूह चरणका अन्तिम तीन खेल हुनेछन् । एफसीएन नौरङ्गे र एएफसी पिपलटार, बागेश्वरी एफसी र गङ्गोत्री एफसी तथा क्षेत्रपुर फुटसल एरिना र भरतपुर ९ बीच प्रतिस्पर्धा हुनेछ ।