स्याङ्जा (हाम्रो खेलकुद) – नवज्योतिका स्पाइकर धनबहादुर भट्ट र दाजुभाई ट्रान्सपोर्ट सेवा प्रालिका वालमिका आचार्य दोस्रो पुरुष तथा महिला भलिबल प्रतियोगिताको सर्वाेत्कृष्ट खेलाडी घोषित भएका छन् ।

धनबहादुर पुरुषतर्फ तथा वालमिका महिलामा सर्वाेत्कृष्ट खेलाडी चुनिएका हुन् । उनीहरुले आ–आफ्नो टोलीलाई च्याम्पियन बनाउन उत्कृष्ट प्रदर्शन गरेका थिए । धनबहादुरले ५ हजार रुपैयाँ र ट्रफी तथा वालमिकाले २ हजार रुपैयाँ र ट्रफी हात पारे ।

व्यक्तिगत विधामा पुरुषतर्फ चक्रकलाका दुर्गा सुनार उत्कृष्ट सर्भर चुनिए । नवज्योतिका सुजन चोखाल उत्कृष्ट सेटर, चक्रकलाका विजय थापा ब्लकर, नवज्योतिका मानबहादुर श्रेष्ठ स्पाइरक र वालिङका ईश्वर गुरुङ लिवेरो घोषित भए । उनीहरुले समान २–हजार रुपैयाँ र ट्रफी प्राप्त गरे ।

पुरुषतर्फ नवज्योति जनसेवा युवा क्लब र महिलामा दाजु भाई ट्रान्सपोर्ट सेवा प्रालि च्याम्पियन बन्न सफल भएको छ । उपाधिसँगै नवज्योतिले १ लाख रुपैयाँसँगै शिल्ड जितेको छ । दोस्रो भएको चक्रकला युवा क्लबले ५० हजार, तेस्रो भएको वालिङले २५ हजार रुपैयाँ तथा सान्त्वना भएको राङखोलाले १० हजार रुपैया र शिल्ड जितेको छ ।

महिलातर्फको विजेता दाजुभाईले २० हजार रुपैया र शिल्ड जितेको छ । दोस्रो भएको स्याङ्जा भलिबलले १० हजार रुपैयाँ तथा तेस्रो भएको आयोजक वालिङले ५ हजार रुपैयाँ प्राप्त गरेको छ । विजयी खेलाडीलाई वालिङ नगरपालिकाका मेयर दिलिप प्रताप खाँण, वालिङ भलिबल क्लबका अध्यक्ष दिपेन्द्र खाँण, नगद पुरस्कार प्रायोजन गरेका दौजित गुरुङ, छविराज गुरुङ र हेमन्त गुरुङका आफन्त लिलमति गुरुङ र लिल्सु गुरुङ, भुपेन लामिछाने, जनक श्रेष्ठ, नारायण प्रसाद शर्मालगायतले पुरस्कृत गरे ।

वालिङ भलिबल क्लबले आफ्नो दोस्रो वार्षिकोत्सवको अवसर पारेर आयोजना गरेको साविकको वडा स्तरीय पुरुष तथा महिला भलिबल प्रतियोगितामा महिलातर्फ ८ टोली तथा पुरुषतर्फ १४ टोलीको सहभागिता रहेको थियो । प्रतियोगिता ८ कात्तिकबाट शुरु भएको थियो । प्रतियोगिताको मुख्य प्रायोजक वालिङ नगरपालिका र सह–प्रायोजक चापाकोट नगरपालिका रहेको छ । विषेश सहयोगीमा भिरकोट नगरपालिका र गल्याङ नगरपालिका रहेका थिए ।