स्याङ्जा (हाम्रो खेलकुद) – नव जनज्योति युवा क्लब कोखे र चक्रकला युवा क्लब लामडाँडा दोस्रो पुरुष तथा महिला भलिबल प्रतियोगिताको पुरुषतर्फको फाइनलमा प्रवेश गरेका छन् ।

स्याङ्जा वालिङस्थित मालेवगरको भलिबल कोर्टमा शुक्रबार भएको पहिलो सेमिफाइनलमा नव जनज्योतिले आयोजक वालिङ भलिबल क्लबलाई २–० को सोझो सेटमा पराजित गर्दै फाइनलमा स्थान बनाएको हो ।

प्रतिस्पर्धात्मक बनेको पहिलो सेटमा एक समय आयोजक वालिङ अघि रहेपनि राष्ट्रिय टोलीका मानबहादुर श्रेष्ठ र धनबहादुर भट्ट तथा सुजन चोखाललाई समेटेको नव जनज्योतिले पूनरागमन गर्दै २५–२३ को जित निकाल्न सफल भयो । दोस्रो सेटमा भने नव जनज्योतिले २५–१९ को सहज जित निकाल्न सफल भयो ।

अर्काे सेमिफाइनलमा चक्रकला युवा क्लबले राङखोला भलिबल क्लबलाई २–० को सोझो सेटमा पराजित गर्दै फाइनलमा नव जनज्योतिसँगको भेट पक्का गरेको छ । एकपक्षीय खेलमा नेपाल एपिएफ क्लबका विजय थापा र दर्गा सुनारलाई समेटेको चक्रकलाले पहिलो सेट २५–१४ ले तथा दोस्रो सेट २५–२० ले आफ्नो पक्षमा पार्न सफल भयो ।

त्यसअघि क्वाटरफाइनलमा नव जनज्योतिले पित्लेक अर्गानिक फार्मलाई, चक्रकलाले रामबाच्छा युवा क्लबलाई पराजित गरेको थियो । यस्तै अर्काे क्वाटरफाइनलमा वालिङ भलिबल क्लबले चक्रदेवी युवा क्लब लाई तथा राङखोलाले सम्झना युवा क्लब बलेउलाई पराजित गरेपनि सेमिफाइनलभन्दा अघि बढ्न सकेन ।

महिला र पुरुषतर्फको फाइनल र तेस्रो स्थानको खेल शनिबार हुनेछ । महिलातर्फ बुधबारै दाजु भाई ट्रान्सपोर्ट सेवा प्रालि नवलपुर र स्याङ्जा भलिबल क्लबले फाइनलमा भेट तय गरेका छन् ।

वालिङ भलिबल क्लबले आफ्नो दोस्रो वार्षिकोत्सवको अवसर पारेर साविकको वडा स्तरीय पुरुष तथा महिला भलिबल प्रतियोगिता ८ देखि १३ कात्तिकसम्म वालिङ खेल मैदानमा हुने आयोजकले जनाएको छ । प्रतियोगितामा महिलातर्फ ८ टोली तथा पुरुषतर्फ १४ टोलीको सहभागिता रहेको छ । प्रतियोगितामा सम्बन्धित वडाका ३ खेलाडी अनिवार्य हुनुपर्ने र बाँकी बाहिरका खेलाडी राख्न पाउने प्रावधान छ ।

पुरुषतर्फको विजेताले १ लाख, दोस्रो हुनेले ५० हजार, तेस्रो हुनेले २५ हजार तथा सान्त्वना हुने टोलीले १० हजार प्राप्त गर्नेछन् । पुरुषतर्फको उत्कृष्ट खेलाडीले ५ हजार तथा व्यक्तिगत विधा (स्पाइकर, सेटर, ब्लकर, सर्भर तथा वेष्ट डिफेन्स) ले जनही २ हजार प्राप्त गर्नेछन् ।

महिलातर्फको विजेताले २० हजार, दोस्रो हुनेले १० हजार तथा तेस्रो हुने टोलीले ५ हजार प्राप्त गर्नेछन् । महिलातर्फको उत्कृष्ट खेलाडीले २ हजार रुपैयाँ प्राप्त गर्नेछन् । प्रतियोगिताको मुख्य प्रायोजक वालिङ नगरपालिका र सह–प्रायोजक चापाकोट नगरपालिका रहेको छ ।

विषेश सहयोगीमा भिरकोट नगरपालिका र गल्याङ नगरपालिका रहेका छन् । वालिङ १० स्थयी घर भएका हाल बेलायत निवासी दौजित गुरुङ, छविराज गुरुङ र हेमन्त गुरुङले पुरुषतर्फको प्रथम पुरस्कार प्रायोजन गरेका छन् । दोस्रो पुरस्कार भारतीय सेनामा कार्यरत सुर्य बहादुर गुरुङ र बेलायत निवासी टिका गुरुङले प्रायोजन गरेका छन् ।

महिलातर्फको प्रथम पुरस्कार भुपेन लामिछानेले तथा दोस्रो पुस्कार वालिङकै हाल फ्रान्समा रहेका अंकित गुरुङ र समाजसेवी रामबच्छ निवासी विरेन्द्र श्रेष्ठले प्रायोजन गरेका छन् ।