दिपक न्यौपाने,बुटवल

रुपन्देहीको सैनामैना नगरपालिका खेल मैत्री नगरपालिका रुपमा परिचित छ। खेलकुदमा विभिन्न कार्यक्रम आयोजनालाई प्राथमिकतामा राख्दै आएको सैनामैनाले खुल्ला ब्यायामशालाको अबधारणा पनि अगाडि सारेको छ। खुल्ला ठाँउमा जुन सुकै समय र उमेर समूहका लागि व्यायाम गर्न मिल्ने गरि खुल्ला व्यायामशाला निर्माण गरिने भएको छ ।

नगरपालिकाको वडा नम्बर २ को बोलबम पार्क, वडा नम्बर ६ को मलमला मन्दिर परिसर र वडा नम्बर ११ को बनकट्टीमा अहिले व्यायमशाला निर्माणका लागि ४५ लाख रुपैयाँ बजेट छुट्टाइएको सैनामैना नगरपालिकाले जनाएको छ । व्यायामशालाको निर्माण यसैबर्ष सम्पन्न हुने गरी उपभोक्ता समिति समेत गठन भइसकेको नगरपालिकाका प्रमुख चित्रबहादुर कार्कीले जानकारी दिए । सर्वसाधारणबाट आउने प्रतिक्रिया र उत्साहका आधारमा अन्य वडामा पनि व्यायामशाला निर्माण गरिने मेयर कार्की बताउँछन् ।

‘व्यायामशाला निर्माणले स्वच्छ र तन्दुरुस्त सैनामैना नागरिक अभियानमा थप सहयोग पुग्ने विश्वास छ ,’ भलिबलका पूर्व खेलाडी समेत रहेका मेयर कार्कीले भने, ‘खुला व्यायामशाला विश्वव्यापी रुपमै लोकप्रिय छ। हामी यसलार्य वैज्ञानिक बिधिबाट सन्चालन गर्ने लक्ष्यमा छौं। योगविधि अनुसार रोगसँग लड्न सक्ने क्षमता विकास हुने खालका प्रविधिबाट व्ययामशाला सञ्चालन गर्नेछौं।’

सैनामैना नगरखेलकुद विकास समितिका अध्यक्ष किशोर रानाले शरीरका सबै अंगको व्यायाम हुने गरिने व्यायामशाला सञ्चालन गरिने बताउँछन्। बार्षिक रुपमा नगर खेलकुद बिकास समितिले योजना बनाएर खेलकुद गतिविधी सन्चालन गरिरहेको उल्लेख गर्दै रानाले खुल्ला व्यायामशालाले नगरको खेलकुद क्षेत्रमा थप टेवा पुग्ने विश्वास लिएको बताए ।

नगरपालिकाका कार्यकारी अधिकृत टेकराज पन्थीले मानिसहरु व्यक्तिगत स्वास्थ्यप्रती खासै सजग भएको पाइदैन त्यसैले पनि हामीले एउटा अभियान चलाउने उद्देश्यका साथ व्यायामशाला निर्माण गर्न लागेको बताउँछन् । ‘विना शुल्क ध्यान योग र चाहे अनुसारको शारीरिक व्यायाम गर्न सकिने छ,’ नगर खेलकुद बिकास समितिका सदस्य अमर लम्साल भन्छन्, ‘नगरपालिकाले यो योजना पहिला नै ल्याउनुपर्ने थियो ,ढिला भए पनि यस प्रति सबै उमेर समुहका नगरबासीको उत्साहजनक सहभागिता रहने छ भन्नेमा आशावादी छौं ।’