धनगढी (हाम्रो खेलकुद) – प्रथम सुदूरपश्चिम प्रदेश स्तरीय पुरुष भलिबल प्रतियोगिताको उपाधि डोटीले जितेको छ । धनगढीमा आयोजना गरिएको फाइनलमा डडेल्धुरालाई ३–० को सोझो सेटले पराजित गर्दै डोटीले उपाधि जितेको हो ।

पहिलो सेट २५–२२ ले जितेको डोटीले दोस्रो सेट सजिलै २५–१३ ले जित्यो । त्यस्तै तेस्रो सेटमा १७–१७ को बराबरीपछि पनि डडेल्धुरा लयमा नफर्कदा डोटीले २५–२१ ले जित्दै च्याम्पियन भएको हो । उपाधिसँगै डोटीले १ लाख रुपैया र ट्रफी हात पारेको छ ।

दोस्रो भएको डडेल्धुराले ५० हजारमा चिक्त बुझाएको छ । सेमिफाइनलमा पराजित भएका कैलाली र कन्चनपुरले समान २५–२५ हजार रुपैया पाएका छन् ।

डोटीका प्रसान्त साहु प्रतियोगिताको सर्वोकृष्ट खेलाडी चुनिए । कञ्चनपुरका सन्तोष महता उत्कृष्ट ब्लकर, कैलालीका महेश खत्री उत्कृष्ट सेटर, डडेल्धुराका वीरवहादुर विक उत्कृष्ट स्पाईकर र डोटीका अनिल जोशी उत्कृष्ट प्रशिक्षक चुनिए । उनीहरुले पनि पुरस्कार पाएका छन् ।

सुदूरपश्चिम प्रदेश खेलकुद परिषद्को आयोजनामा भएको प्रतियोगिताको विजयी टोली तथा खेलाडीलाई परिषदका सदस्य सचिव दिपकबहादुर सिंह, सुदुरपश्चिम सरकारका सामाजिक विकास मन्त्री लालवहादुर खड्का र आन्तरिक मामिला तथा कानुन मन्त्री पुर्णा जोशीलगायतले पुरस्कृत गरे ।

सुदूरपश्चिम खेलकुद परिषद्को वार्षिक कार्यक्रम अनुसार भएको प्रतियोगितामा प्रदेशका ९ वटै जिल्लाका टिमहरूको सहभागिता रहेको थियो ।