काठमाडौं (हाम्रो खेलकुद) – प्रदेश खेलकुद बिकास परिषद् बागमतीले प्रदेश खेलकुद प्रतियोगिता आयोजना गर्ने भएको छ । प्रदेशकै सबैभन्दा ठूलो कार्यक्रमको रुपमा विगत दुई वर्षदेखि नै आयोजनाको तयारी गरिएको उक्त प्रतियोगिता आगामी पुस र माघमा सञ्चालन हुने भएको छ ।

आगामी फागुनमा पोखरामा आयोजना हुने नवौं राष्ट्रिय खेलकुद प्रतियोगितालाई मध्यनजर गरि प्रदेशले आफ्नो टिम तयारीको लागी पनि नवौं राष्ट्रिय खेलकुद भन्दा पहिले नै प्रदेश खेलकुद सम्पन्न गर्ने तयारी गरेको हो ।

१५ असोजमा प्रदेशका सामाजिक विकास मन्त्री बिजय सुबेदीको अध्यक्षतामा बसेको परिषद् बैठकले गरेका निर्णयहरु शुक्रबार सार्वजनिक गरिएको हो । प्रदेश खेलकुद विकास परिषद्को विनियोजित २ करोड र थप ४ करोड ५४ लाख प्रदेश सरकारसँग माग गरि जम्मा ६ करोड ५४ लाखको कुल लागत अनुमान स्वीकृत गरिएको छ ।

स्थानिय, जिल्ला र प्रदेश गरि तीन चरणमा हुने उक्त प्रतियोगितामा फुटबल, भलिबल, क्रिकेट, एथलेटिक्स, तेक्वान्दो, कराते, बक्सिङ, ब्याडमिन्टन समाबेश हुनेछन् । प्रतियोगिताको लागि स्थानीय तहले प्रतियोगिता वा छनोटमार्फत टिम तयार गरि जिल्ला प्रतियोगिताको लागि सहभागी पठाउनु पर्नेछ । प्रत्येक जिल्लाले जिल्ला प्रतियोगिताको लागि ८ लाख अनुदान प्राप्त गर्नेछन् ।

जिल्ला टिममा ब्यक्तिगत स्पर्धामा खेलिने खेलबाट बिजेता खेलाडीलाई खेलाइने छ । समुह खेलमा बिजेता र अन्य टिमका पनि उत्कृष्ट खेलाडी मध्येबाट जिल्ला टिम तयार गरि प्रदेशमा सहभागी गराइनेछ । प्रतियोगितामा सबै खेलका महिला र पुरुष टिम सहभागी हुनेछन् । क्रिकेटको पुरुष टिमले मात्रै सहभागीता जनाउने छ ।

करिब एक महिना सम्म चल्ने प्रदेश खेलकुद प्रतियोगिता प्रदेशका १३ वटै जिल्लालाई समेट्ने गरि आयोजना गरिने परिषद्का सदस्यसचिव सुर्यलाल भण्डारीले बताए । पर्यटकीय सिजनमा साहसिक तथा पर्यटकीय खेलकुद हुने प्रदेश खेलकुद बिकास परिषद्ले नेपालको पर्यटकीय सिजन कार्तिक र मंसिरको दोस्रो सातासम्ममा ३ वटा साहसिक तथा पर्यटकीय खेलकुद प्रतियोगिता आयोजना हुनेछ ।

१३ कात्तिकमा विश्वमै पहिलोपटक दोलखाको चरिकोटमा हाइ अल्टिच्युड रेस्लिङ, २७ गते सिन्धुपाल्चोकको पाँचपोखरीमा अल्ट्रा म्याराथन र मंिसर १० गते रसुवामा माउन्टेन साइक्लिङ प्रतियोगिता आयोजना गरिनेछ ।