काठमाडौं (हाम्रो खेलकुद) – एनआरएनए एलसीसी साल्जवर्गले गत आइतबार जर्मनीमा भएको चिम्निज ओपन अन्तर्राष्ट्रिय कराते च्याम्पियनसिपमा दोहोरो स्पर्णपदक मन्देकाजी श्रेष्ठ र एक स्वर्ण र एक कास्यपदक जित्न सफल मुकुन्द्र महर्जनलाई सम्मानित गरेका छन् ।

एनआरएनए एलसीसी साल्जवर्गका अध्यक्ष शिव खड्का, अष्ट्रियाका आइसीसी सदस्य बिकास कार्की, एलसीसी साल्जवर्गका संरक्षक तथासंघका सम्पुर्ण सदस्यले उनीहरुलाई सम्मान पत्र र मायाको चिनोले सम्मानित गरेका हुन् । सम्मानपछि एनआरएनए एलसीसी साल्जवर्गले भावी समयमा खेलकुद क्षेत्रमा साथ दिने बताएका छन् ।

१३औं दक्षिण एसियाली खेलकुद (साग) का दोहोरो स्वर्णधारी मन्देकाजी श्रेष्ठले सिनियर एकल काता र ३० वर्षमाथिको उमेर समूहमा स्वर्ण जित्न सफल भएका थिए । यस्तै मुकुन्द्र महर्जनले ३० वर्षमाथिको उमेर समूहका स्वर्णपदक र ७५ केजी तौल समूहमा कास्यपदक जित्न सफल भएका छन् ।

उक्त च्याम्पियनसिपमा नेपालले ४ स्वर्ण र २ कास्यपदक जित्न सफल हुदा सिनियर एकल कातामा सुमन तिमल्सिनाले कास्य तथा आफ्नो उमेर समूहमा स्वर्णपदक जितेका थिए । च्याम्पियनसिपमा आयोजक जर्मनीसँगै पोल्यान्ड, अष्ट्रिया, अजरबैजान, इरान, नेदरल्यान्ड्स, स्पेन र बेल्जियमलगायतको राष्ट्रको सहभागिता रहेको थियो ।