विजय नेपाली, पोखरा

मणि लामाले ह्याट्रिकसहित चार गोल गरेपछि शंखमुल फुटसल काठमाडौंले अतिरिक्त समयमा दि राइजिङ क्लब धरानमाथि जित निकाल्दै राष्ट्रिय ‘ए’ डिभिजन फुटसल लिगको फाइनलमा प्रवेश गरेको छ ।

पोखरास्थित बहुउद्देश्यीय कभर्डहलमा बिहीबार भएको दोस्रो क्वालिफायरमा शंखमुलले राइजिङलाई अतिरिक्त समयमा ४–३ ले पराजित गर्दै फाइनलमा स्पोर्ट्स क्यासल पोखरासँगको भेट पक्का गरेको हो । शंखमुलको जितमा सबै चार गोल मणि लामाले गरे । राइजिङका विसन श्रेष्ठले दुई तथा हेमन्त थापा मगरले एक गोल गरेपनि हार टार्न सकेन ।

खेलको पहिलो मिनेटमा नै मणि लामाको गोलबाट शंखमुलले अग्रता लिएको थियो । ११औं मिनेटमा विसन श्रेष्ठले गोल गर्दै खेललाई १–१ गोलको बराबरीमा ल्याए । १५औं मिनेटमा मणि लामाले व्यक्तिगत दोस्रो गोल गर्दै शंखमुललाई २–१ को अग्रता दिलाए । २४औं मिनेटमा हेमन्त थापा मगरले गोल गर्दै खेललाई २–२ गोलको बराबरीमा ल्याए ।

२८औं मिनेटमा विसन श्रेष्ठले गोल गरेपछि राइजिङले खेलमा ३–२ को अग्रता लिन सफल भयो । तर, शंखमुलका मणिले आफ्नो गोलको लयलाई कायमै राख्दै गोल गरेपछि खेल आफ्ना् पक्षमा पार्न सफल भयो ।

४०औं मिनेटमा मणिले ह्याट्रिक पुरा गर्दै खेललाई ३–३ गोलको बराबरीमा ल्याउँदै खेललाई अतिरिक्त समयमा लम्ब्याए । अतिरिक्त समयको ४३औं मिनेटमा मणिले व्यक्तिगत चौथो गोल गर्दै शंखमुललाई फाइनलको यात्रा तय गराए ।

यसअघि स्पोर्ट्स क्यासलले पहिलो क्वालिफायरमा दि राइजिङमाथि ८–६ को जित निकाल्दै फाइनलमा स्थान तय गरेको थियो । फाइनल शुक्रबार हुनेछ ।

लिगको विजेताले १० लाख तथा उपविजेताले ५ लाख रुपैयाँ पाउनेछ । लिगको विंगर (एएलए–पिभोट), डिफेन्डर (फिक्सो), उदियमान खेलाडी, गोलरक्षक र प्रशिक्षकले समान २५ हजार पाउनेछन् ।