धनगढी (हाम्रो खेलकुद)– कैलालीको धनगढीमा सुदूरपश्चिम प्रदेशस्तरीय प्रथम भलिबल प्रतियोगिता बुधबारदेखि सुरु भएको छ । प्रतियोगिताको पहिलो दिन कञ्चनपुर, कैलाली, डोटी र डडेल्धुराले विजयी भएका छन् । उद्घाटन खेलमा कञ्चनपुरले अछामलाई ३–१ को सेटमा हराएको छ ।

दोश्रो खेलमा कैलालीले दार्चुलालाई ३–०, तेस्रोमा डोटीले बैतडीलाई ३–१ र चौथो डडेल्धुराले बाजुरालाई ३–० को सेटमा पराजित गर्यो । प्रतियोगितामा बिहीबार लिग चरणका ६ वटा खेल हुनेछन् । प्रदेश स्तरीय पुरुष भलिबल प्रतियोगिता २०७८ सुदूरपश्चिम खेलकुद परिषद्को वार्षिक कार्यक्रम अनुसार असोज २३ गतेसम्म चल्नेछ ।

प्रदेशका ९ वटा जिल्लाका टोलीको सहभागिता रहेको प्रतियोगिताको विजेता टोलीले १ लाख, दास्रो टोलीले ४० हजार र सेमिफाइनल पुग्ने टोलीले समान २५ हजार रुपैयाँ प्राप्त गर्ने सुदूरपश्चिम खेलकुद परिषद्का सदस्य सचिव दीपकबहादुर सिंहले जानकारी दिए । प्रतियोगिताका विभिन्न ५ वटा विधाका उत्कृष्ट खेलाडीलाई पनि पुरस्कार प्राप्त गर्ने छन् ।

सुदूरपश्चिममा पहिलो पटक आयोजित प्रदेश भलिबलमा उत्कृष्ट प्रदर्शन गर्ने खेलाडीबाट सुदूरपश्चिम प्रदेशको भलिबल टोली बनाइने सिंहले बताए । भविष्यमा हुने राष्ट्रिय प्रतियोगिताहरुमा त्यहि टोलीले सुदूरपश्चिमको प्रतिनिधित्व गर्ने बताइएको छ । सुदूरपश्चिमका मुख्यमन्त्री त्रिलोचन भट्टले प्रतियोगिताको उद्घाटन गरेका हुन् ।