काठमाडौं (हाम्रो खेलकुद) – काठमाडौं किंग्स इलेभेनका ओपनर अमित श्रेष्ठले एभरेष्ट प्रिमियर लिग (इपिएल) को चौथो संस्करणमा पोखरा राइनोजविरुद्ध अर्धशतक प्रहार गरेका छन् । अमितले ३६ बलमा अर्धशतक पूरा गरेका छन् । अमितले १४ औं अ‍ेभरको तेस्रो बलमा विक्रम सोबलाई चौका प्रहार गर्दै अर्धशतक पूरा गरेका थिए ।

टियु क्रिकेट मैदानमा टस हारेर ब्याटिङ थालेको काठमाडौंले १४ ओभरमा २ विकेट गुमाउँदै १ सय रन बनाएको छ । अमित ३७ बलमा ६ चौका र २ छक्का सहित ५२ रनमा अविजित छन् । रायन बर्ल १ चौका र ३ छक्का सहित ३९ रनमा अविजित छन् । तेस्रो विकेटका लागि रायन र अमितले १ सय २ रनको अविजित शतकीय साझेदारी गर्दै टोेलीको इनिङ अगाडि बढाएका छन् ।

दोस्रो ओभरको दोस्रो बलमा ओपनर रहमानउल्लाह गुरबाजलाई रित गौतमले १२ रनमा रन आउट गर्दै पोखरालाई महत्वपूर्ण सफलता दिलाएका थिए । रितले ननस्ट्राइकमा सिधैं स्टम्प ताक्दै गुरबाजलाई पेभिलिएनको बाटो देखाए । तेस्रो ओभरको पहिलो बलमा विक्रम सोबले सुवास खकुरेललाई २ रनमा एलबिडब्लू आउट गरेका थिए ।

काठमाडौं र पोखरा दुबैले आजको खेलमा टोलीमा एक एक परिवर्तन गरेका छन् । सिद्धान्त लोहनीको स्थानमा काठमाडौंले मोहम्मद साम्सद शेखले मौका दिएको छ । पोखराले तीव्र गतिका बलर किशोर महतोलाई मौका दिँदा स्पिन अलराउन्डर विपिन खत्रीलाई बेन्चमा राखेको छ ।