काठमाडौं (हाम्रो खेलकुद) – होङ्गान्जी न्यु डायमन्ड स्पोर्ट्स क्लबले वाई वाई डाइनामाइट छैटौं एनभिए राष्ट्रिय महिला तथा पुरुष क्लब भलिबल च्याम्पियनसिपको महिलातर्फको उपाधि जितेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शनिबार भएको खेलमा चिरपरिचि प्रतिद्धन्द्धी नेपाल एपीएफ क्लबलाई ३–१ को सेटमा हराउँदै च्याम्पियन बन्न सफल भएको हो ।

यो सँगै डायमन्डले गत बैशाखमा सिन्धुपाल्चोकमा भएको भोटेकोशी गाँउपालिका अध्यक्ष कपमा बेहोरेको फाइनल हारको बदलासमेत लिन सफल भएको छ । न्यु डायमन्डको सिजनको यो पहिलो उपाधि हो । यसअघि गत बैशाखमा सिन्धुपाल्चोकमा भएको भोटेकोशी अध्यक्ष कपमा एपीएफसँग पराजित हुन पुगेको थियो । डायमन्डसँगको हारसँगै एपीएफ वर्षको दोस्रो उपाधि जित्नबाट सफल भयो ।

प्रतिस्पर्धात्मक पहिलो सेट गुमाएपनि डायमन्डले पूनरागमन गर्दै त्यसपछिको तीन सेट आफ्नो पक्षमा पार्दै च्याम्पियन बन्न सफल भएको हो । सुरुवाती समयमा ६–२ ले अग्रता लिएपनि त्यसलाई जोगाउन नसक्दा डायमन्डले पहिलो सेट २४–२६ ले गुमाउन पुगेको थियो ।

तर त्यसपछि डायमन्डले लगातार तीन सेट आफ्नो पक्षमा पार्न सफल भयो । दोस्रो सेटमा एक समय १५–८ को आरामदायी अग्रता लिएपनि एपीएफले पुनरागमन प्रयास गरेपनि डायमन्ड २५–२१ ले विजयी हुन सफल भयो । तेस्रो सेट पनि डायमन्डले २५–१७ ले आफ्नो पक्षमा पार्दै जितनजिक पुग्यो ।

चौथो सेटमा १५–८ को अग्रता लिएपनि एपीएफले पुनरागमन गर्दा खेल १७–१५ को अवस्थामा पुगेको थियो । त्यसपछि लगातार ८ अंक जोड्दै डायमन्डले खेल २५–१५ ले आफ्नो पक्षमा पार्दै च्याम्पियन बन्न सफल भयो ।

छैटौ संस्करणसम्म आइपुग्दा न्यु डायमन्ड क्लब च्याम्पियनसिपमा दोस्रोपटक च्याम्पियन बन्न सफल भएको हो । त्यसअघि डायमन्ड तेस्रो संस्करणमा च्याम्पियन बनेको थियो । पहिलो संस्करणमा तेस्रो भएको डायमन्ड चौथो र पाँचौ संस्करणमा उपविजेता बनेको थियो ।

उपाधिसँगै डायमन्डले ४ लाख रुपैयाँ हात पारेको छ । दोस्रो भएको एपीएफले २ लाख रुपैयाँमा चित्त बुझाएको छ । तेस्रो भएको त्रिभुवन आर्मी क्लबले १ लाख रुपैयाँ प्राप्त गरेको छ । आर्मीले पुलिसलाई हराउँदै तेस्रो स्थान हासिल गरेको थियो । पुरुषतर्फ उपाधिको लागि साविकको विजेता टिप टप हेल्प नेपाल स्पोर्ट्स क्लब र विभागीय त्रिभुवन आर्मी क्लब खेल्दैछन् ।