पोखरा (हाम्रो खेलकुद) – स्पोर्ट्स क्यासल पोखरा र प्रभातफेरी युथ क्लब काठमाडौंले ‘ए’ डिभिजन राष्ट्रिय फुटसल लिगमा जित दर्ता गरेका छन् ।

पोखरास्थित बहुउद्देश्यीय कभर्डहलमा शुक्रबार भएको खेलमा स्पोर्ट्स क्यासलले सविन मेमोरियललाई २–० ले पराजित गर्दै आफ्नो शीर्षतालाई कायम राखेको हो । स्पोर्ट्स क्यासलको जितमा सुरज गुरुङ र किशोर गुरुङले गोल गरे ।

जितपछि अपराजित रहेको स्पोर्ट्स क्यासलको ७ खेलबाट १९ अंक पुगेको छ । सविन मेमोरियल ७ खेलबाट १० अंक जोडेर छैटौ स्थानमा रहेको छ ।

यस्तै अर्काे खेलमा प्रभातफेरीले झरना स्पोर्ट्स क्लबलाई ७–३ ले पराजित गरेको छ । प्रभातफेरीको जितमा सिजन गुरुङले दुई तथा अखिलेस कार्की, श्रीजेश पुरी, सन्तलाल गुरुङ, नवीन लामा र धिरज जोशीले समान एक गोल गरे ।

झरनाका प्रेम छन्त्याल र जितेश गुरुङले समान एक गोल गर्दा एक गोल उपहार पाएको थियो । यो जितपछि प्रभातफेरी ७ खेलबाट ७ अंक जोडेर आठौं स्थानमा यथावत रहेको छ । पराजित झरनाले अंकको खाता खोल्न सकेको छैन ।

यस्तै अर्काे खेलमा शंखमुल फुटसल र स्काई गोल्सले २–२ गोलको बराबरी खेल्दै अंक बाँडेका छन् । शंखमुलका क्रिजल खड्का र अरुज सिंहले गोल गर्दा स्काई गोल्सका आशिष सुनाम र मिसन लामाले गोल गरे ।

यो बराबरीपछि शंखमुल ७ खेलबाट १५ अंक जोडेर दोस्रो स्थानमा रहेको छ । स्काई गोल्स १० अंक जोडेर पाँचौ स्थानमा रहेको छ । लिगमा शनिबार दुई खेल हुनेछ । लुम्विनी फुटसल र राइजिङ क्लब तथा फुटसल फाइभ र स्पोर्ट्स क्यासल पोखराबीच प्रतिस्पर्धा हुनेछ ।

लिगमा सहभागी १० टोलीले एकल राउन्ड रोविन लिगबाट शीर्ष चार टोलीले प्ले अफमा स्थान बनाउनेछन् । पहिलो प्लेअफको विजेताले फाइनलमा स्थान बनाउने छ । तेस्रो र चौथो हुने टोलीबीच दोस्रो प्लेअफमा प्रतिस्पर्धा हुनेछ । एलिमिनेटरमा पहिलो प्लेअफमा पराजित हुने टोली र दोस्रो प्लेअफको विजेताले फाइनल प्रवेशका लागि खेल्नेछन् ।

लिगको विजेताले १० लाख रुपैयाँ पाउनेछ भने उपविजेताले ५ लाख रुपैयाँ पाउनेछ । लिगको विंगर (एएलए–पिभोट), डिफेन्डर (फिक्सो), उदियमान खेलाडी, गोलरक्षक र प्रशिक्षकले समान २५ हजार पाउनेछन् ।