काठमाडौं (हाम्रो खेलकुद) – विभागीय नेपाल पुलिस क्लबको चुनौती पन्छाउँदै होङ्गान्जी न्यु डायमन्ड स्पोर्ट्स क्लब वाई वाई डाइनामाइट छैटौं एनभिए राष्ट्रिय महिला तथा पुरुष क्लब भलिबल च्याम्पियनसिपको महिलातर्फको फाइनलमा प्रवेश गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको दोस्रो सेमिफाइनलमा पुलिसमाथि ३–२ को संघर्षपुर्ण जित निकाल्दै डायमन्डले फाइनलमा नेपाल एपीएफसँगको भेट पक्का गरेको हो ।

प्रतिस्पर्धात्मक पहिलो सेट १८–२५ ले गुमाएको डायमन्डले दोस्रो सेट २५–१७ ले आफ्नो पक्षमा पार्दै खेललाई १–१ सेटको बराबरीमा ल्याए । प्रतिस्पर्धात्मक तेस्रो सेट २५–२१ ले आफ्नो पक्षमा पारेपछि पुलिसले २–१ को सेटमा अग्रता लियो । चौथो सेट डायमन्डले २५–१७ ले जितेपछि खेल पाँचौ सेटमा लम्बिएको थियो । निर्णायक सेटमा सुरुवाती समयमा डायमन्ड पछि परेपनि पूनरागमन गर्दै १५–१० को सेटमा जित निकाल्दै फाइनलमा पुग्न सफल भयो ।

अब डायमन्डले उपाधिका लागि शनिबार नेपाल एपीएफको सामना गर्नेछ । एपीएफले शुक्रबारै त्रिभुवन आर्मी क्लबलाई ३–२ को सेटमा हराउँदै फाइनलमा स्थान पक्का गरिसकेको छ । तेस्रो स्थानको लागि आर्मी र पुलिसले शनिबारै प्रतिस्पर्धा गर्नेछ ।

पुरुषतर्फको सेमिफाइनलका खेल आजै (शुक्रबार) हुनेछ । सेमिफाइनलमा टिप टप हेल्प नेपाल स्पोर्ट्स क्लब र नेपाल पुलिस क्लब तथा त्रिभुवन आर्मी क्लब र एपीएफबीच प्रतिस्पर्धा हुनेछ ।