काठमाडौं (हाम्रो खेलकुद) – दुई विभागीय टोली नेपाल पुलिस क्लब र त्रिभुवन आर्मी क्लब वाईवाई डाइनामाइट छैटौं एनभिए राष्ट्रिय महिला तथा पुरुष क्लब भलिबल च्याम्पियनसिपको महिलातर्फ सेमिफाइनलमा प्रवेश गरेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बुधबार भएको खेलमा ढोरपाटन स्पोर्ट्स क्लबमाथि ३–० को सोझो सेटमा जित निकाल्दै एक खेल बाँकी छदै अन्तिम चारमा पुग्न सफल भएको हो ।

पुलिसले तीन भारतीय खेलाडी समेटेपनि तुलनात्मक रुपमा कमजोर ढोरपाटनमाथि २५–१४, २५–१३ र २५–११ सोझो सेटमा हरायो । पुलिसको जितले समूह ‘ए’ बाट नेपाल एपीएफले पनि अन्तिम चारमा स्थान सुरक्षित गर्न सफल भएको छ । अब पुलिस र एपीएफबीच समूह विजेताको लागि प्रतिस्पर्धा हुनेछ ।

यस्तै आर्मीले एभरेस्ट भलिबल ट्रेनिङ क्लबलाई ३–० को सोझो सेटमा हराउँदै एक खेल बाँकी छँदै अन्तिम चारमा स्थान पक्का गरेको हो । पहिलो सेटमा २५–१२ को सहज जित निकालेको आर्मीले दोस्रो सेट २५–१३ ले आफ्नो पक्षमा पार्दै जित नजिक पुगेको थियो ।

तेस्रो सेटमा नयाँ खेलाडीलाई अवसर दिदा एभरेस्टले आर्मीलाई चुनौती दिदा खेल २१–१९ को अवस्थामा पुगेको थियो । सेटको अन्त्यतिर आर्मीले पहिलो रोजाईकै खेलाडीलाई कोर्ट उतारेपछि आर्मीले २५–२१ को जित निकाल्न सफल भयो ।

आर्मीको जितले होङ्गान्जी न्य डायमन्ड स्पोर्ट्स क्लब पनि समूह ‘बी’ बाट एक खेल बाँकी छदै सेमिफाइनलमा पुग्न सफल भएको छ । अब बिहीबार आर्मी र डायमन्डबीच समूह विजेताको लागि भिड्नेछन् । महिलातर्फको लिगको अन्तिम खेल बिहीबार हुनेछ ।

यो नतिजासँगै पुरुषतर्फको क्वाटरफाइनल समिकरण पुरा भएको छ । क्वाटरफाइनलमा हेल्प नेपाल र नयाँ बजार, पुलिस र ढोरपाटन, आर्मी र गल्कोट तथा एपीएफ र गण्डकी प्रदेशबीच खेल हुनेछ । सबै चार क्वाटरफाइनल बिहीबार हुनेछ ।