पोखरा (हाम्रो खेलकुद) – शंखमुल फुटसलले ‘ए’ डिभिजन राष्ट्रिय फुटसल लिगमा लुम्विनी फुटसललाई पराजित गरेको छ । शंखमुलले लुम्विनीमाथि ३–२ को जित निकालेको हो ।

पोखरास्थित बहुउद्देश्यीय कभर्डहलमा बुधबार भएको खेलमा शंखमुलको जितमा विवेक पण्डित, क्रिजल खड्का र सागर थिङले गोल गरे । लुम्बिनीका रुपेन बराइली र राफी महर्जनले गोल गरेपनि हार टार्न सकेन ।

यो जितपछि शंखमुल ६ खेलबाट १४ अंक जोडेर दोस्रो स्थानमा उक्लिएको छ । पराजित लुम्विनी ४ अंकसहित नवौं स्थानमा रहेको छ ।

यस्तै अर्काे खेलमा स्पोर्ट्स क्यासल पोखराले झरना स्पोर्ट्स क्लबलाई ५–१ को फराकिलो अन्तरले पराजित गर्दै शीर्षस्थानमा यथावत रहन सफल भएको । स्पोर्ट्स क्यासलको जितमा खिमराज गुरुङले दुई गोल गर्दा विजय गुरुङ, विसन गुरुङ र किशोर गुरुङले समान एक गोल गरे । झरनाका नारायण थापामगरले सान्त्वना गोल फर्काए ।

यो जितपछि अपराजित रहेको स्पोर्ट्स क्यासल ६ खेलबाट १६ अंक जोडेर शीर्षस्थानमा रहेको छ । झरना छैटौ खेलमा पनि जित निकाल्न नसक्दा अंकविहीन हुदै पुछारमा रह्यो ।

यस्तै अर्काे खेलमा स्काई गोल्सले प्रभातफेरी युथ क्लबलाई ५–४ को गोल अन्तरले पराजित गरेको छ । स्काई गोल्सको जितमा निर्मल गुरुङ, श्रीकृष्ण श्रेष्ठ र आशिष सुनामले गोल गर्दा एक गोल उपहार पाएको थियो ।

प्रभातफेरीका विशाल सारुमगरले दुई तथा अखिलेस कार्कीले एक गोल गरेपनि हार टान सकेन । सन्तलाल गुरुङको आत्मघाती गोलबाट स्काई गोल्सले खेलको पहिलो मिनेटमा नै अग्रता लिएको थियो ।

यो जितपछि स्काई गोल्स ६ खेलबाट ९ अंक जोडेर पाँचौ स्थानमा उक्लिएको छ । पराजित प्रभातफेरी ४ अंक जोडेर आठौं स्थानमा रहेको छ ।
लिगमा बिहीबार दुई खेल हुनेछ । दि राइजिङ क्लब धरान र फुटसल फाइभ तथा ढुकु फुटसल र लुम्विनीबीच प्रतिस्पर्धा हुनेछ ।

लिगमा सहभागी १० टोलीले एकल राउन्ड रोविन लिगबाट शीर्ष चार टोलीले प्ले अफमा स्थान बनाउनेछन् । पहिलो प्लेअफको विजेताले फाइनलमा स्थान बनाउने छ । तेस्रो र चौथो हुने टोलीबीच दोस्रो प्लेअफमा प्रतिस्पर्धा हुनेछ । एलिमिनेटरमा पहिलो प्लेअफमा पराजित हुने टोली र दोस्रो प्लेअफको विजेताले फाइनल प्रवेशका लागि खेल्नेछन् ।

लिगको विजेताले १० लाख रुपैयाँ पाउनेछ भने उपविजेताले ५ लाख रुपैयाँ पाउनेछ । लिगको विंगर (एएलए–पिभोट), डिफेन्डर (फिक्सो), उदियमान खेलाडी, गोलरक्षक र प्रशिक्षकले समान २५ हजार पाउनेछन् ।