काठमाडौं (हाम्रो खेलकुद) – साविकको विजेता टिप टप हेल्प नेपाल स्पोर्ट्स क्लब वाइवाइ डाइनामाइट छैटौं एनभिए राष्ट्रिय महिला तथा पुरुष क्लब भलिबल च्याम्पियनसिपको पुरुषतर्फ समूह ‘ए’ को विजेता बन्दै क्वाटरफाइनलमा प्रवेश गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बुधबार भएको खेलमा हेल्प नेपालले गल्कोटलाई ३–१ को सेटमा पराजत गर्दै समूह विजेता बनेको हो । हेल्प नेपालसँगको हारले पनि गल्कोट समूह उपविजेताको रुपमा अन्तिम आठमा पुग्न सफल भयो ।

पहिलो सेटमा २५–१८ को जित निकालेको हेल्प नेपालले दोस्रो सेट २२–२५ ले गुमाउँदा खेल थप रोमाञ्चक बनेको थियो । तेस्रो सेट २५–२२ ले जित्दै खेलमा फर्किएको हेल्प नेपालले चौथो सेट २५–१९ ले सहजै आफ्नो पक्षमा पार्दै विजयी हुन सफल भयो ।

जितपछि हेल्प नेपालले ३ खेलबाट ९ अंक जोड्यो । पराजित गल्कोट ६ अंकसहित दोस्रो स्थानमा रह्यो । यो समूहबाट प्रदेश २ र बागमती प्रदेशले समुह चरण पार गर्न सकेन ।

त्यसअघि समूह ‘बी’ बाट नेपाल पुलिस क्लब र गण्डकी प्रदेशले क्वाटरफाइनलमा स्थान बनायो समूह ‘सी’ बाट त्रिभुवन आर्मी क्लब र नयाँ बजार तथा समूह ‘डी’ नेपाल एपिएफ क्लब र ढोरपाटनले क्वाटरफाइनलमा स्थान बनाउन सफल भएको छ ।

च्याम्पियनसिपमा बुधबार पुरुषतर्फ प्रदेश २ र बागमती प्रदेशबीच खेल हुनेछ । महिलातर्फ ढोरपाटन र नेपाल पुलिस क्लब तथा एभरेस्ट र आर्मीबीच प्रतिस्पर्धा हुनेछ ।