काठमाडौं (हाम्रो खेलकुद) – नेपाल ओलम्पिक कमिटी (एनओसी) ले आफ्ना पूर्व अध्यक्ष तथा मानार्थ अध्यक्ष रुक्म शमशेर राणाको स्मृतिमा बुधबार शोक सभाको आयोजना गरेको छ ।

राणाको निधन भएको १३औं पुण्य तिथिमा कमिटीले सातदोबाटो श्रद्धान्जली कार्यक्रम गरेको हो । राणाको भदौ २५ मा निधन भएको थियो । राणा सन् १९९८ देखि २००७ सम्म कमिटीको अध्यक्ष रहेका थिए । उनले राष्ट्रिय खेलकुद परिषद, फुटबल, तेक्वान्दो, एथलेटिक्स र स्कि संघका नेतृत्व पनि सम्हालेका थिए ।

शोक सभामा कमिटीका अध्यक्ष जीवनराम श्रेष्ठले नेपाली ओलम्पिक आन्दोलनमा राणाको ठूलो योगदान रहेको बताउँदै नेपाली खेलकुदमा ओलम्पिक आन्दोलनको मान्यता स्थापित गर्ने श्रेय उहाँलाई जाने बताए ।

‘नेपाली ओलम्पिक आन्दोलन यहाँसम्म आइपुग्नुमा सबैभन्दा ठूलो योगदान राणाकै छ ।’ परिवारको प्रतिनिधित्व गर्दै अनिलकेशरी शाहले नेपाली खेलकुद र खेलाडीप्रति राणाको असाध्यै माया रहेको बताए ।

नेपाल तेक्वान्दो संघका अध्यक्ष प्रकाश शमशेर राणाले नेपाली तेक्वान्दोको विकासमा उहाँको अतुलनीय योगदान रहेको बताए । यस्तै कमिटीका महासचिव निलेन्द्र श्रेष्ठले दिवंगत राणा नेपालमा विवादरहित खेलकुद चाहनु हुने व्यक्तित्व रहेको बताए । उनले नेपाली खेलकुद एकजुट भएर अगाडि बढ्छ भने त्यो नै राणाप्रति सच्चा श्रद्धान्जली हुने थपे ।

शोक सभामा कमिटीका पदाधिकारी, विभिन्न कमिटीका अध्यक्ष, खेल संघका अध्यक्षलगायत अन्यको पनि उपस्थिति रहेको थियो ।