काठमाडौं (हाम्रो खेलकुद) – टोकियो पारालिम्पिकमा लाइन जजको भुमिका निर्वाह गरेका ब्याडमिन्टन एशियाका एक्रिडियटेड अम्पायर, बिश्व ब्याडमिन्टन महासंघका सर्टिफाईड लाईन जज तथा राष्ट्रिय अम्पायर उदय अर्याललाई नेपाली राष्ट्रिय ब्याडमिन्टन अम्पायरहरुले स्वागत तथा सम्मान गरेका छन् ।

प्रथम रिभाइव लिजर पार्क खुल्ला राष्ट्रिय ब्याडमिन्टन च्याम्पियनसिपको समापन समारोह दौरान उनलाई सम्मान गरिएको हो । राष्ट्रिय ब्याडमिन्टन अम्पायर पुष्पा घिमिरे, दुर्गा भण्डारी शर्मा, मन्दिरा न्यौपाने, केदार धिमाल, निरन्जन रिमाल, राजु श्रेष्ठ, भानुभक्त सिटौला र भवानी विक्रम आङदेम्वे, ऋषि अर्याल, विकास खेतानलगायतले सम्मानित गरेका हुन् । यस्तै नेपाल ब्याडमिन्टन संघका अध्यक्ष रामजी बहादुर श्रेष्ठ, उपाध्यक्ष सुभास श्रेष्ठ र सचिव समिर बहादुर सिंहको पनि उपस्थिति रहेको थियो ।

अम्पायर अर्यालले टोकियो पारालिम्पिकमा पहिलो चरणदेखि फाइनल चरणसम्म १७ खेलमा खेलाएको थियो । पारालिम्पिकमा पारा ब्याडमिन्टन पहिलोपटक समावेश गरिएको विधा हो । त्यसमा सहभागी हुने अर्याल पहिलो नेपाली बिडब्लुएफ लाइन जज बने ।

अर्यालले यसअघि पोल्याण्डको क्याटोविचमा सन् २०१९ मा आयोजना भएको बिश्व सिनियर ब्याडमिन्टन च्याम्पियनसिप र हङकङमा अप्रिल सन् २०१९ मा आयोजना भएको ब्याडमिन्टन एशिया मिक्स टिम च्याम्पियनसिपमा पनि निर्णायकको भूमिका निर्वाह गरिसकेका छन् ।