काठमाडौं (हाम्रो खेलकुद) – बागमती प्रदेश खेलकुद बिकास परिषद्ले चार वटा राष्ट्रिय खेल संघसँग प्रशिक्षक तालिम सञ्चालनको लागि सम्झौता गरेको छ ।

संघले प्रशिक्षक तालिमका लागि नेपाल ब्याडमिन्टन संघ, नेपाल एथलेटिक्स संघ, नेपाल रग्वी संघ र नेपाल आइटिएफ तेक्वान्दो संघसँग बुधबार सम्झौता गरेको हो । सम्झौतामा बागमती प्रदेश खेलकुद बिकास परिषद्का सदस्यसचिव सुर्य लाल भण्डारी, ब्याडमिन्टन संघका अध्यक्ष रामजी बहादुर श्रेष्ठ, रग्वी संघका अध्यक्ष टंकलाल घिसिङ,आइटिएफ तेक्वान्दोका अध्यक्ष अन्जन धमला र एथलेटिक्स संघको तर्फबाट राखेप अन्तरगतको एथलेटिक्सको वरिष्ठ प्रशिक्षक चन्द्र गुरुङले हस्ताक्षर गर्दै आदान–प्रदान गरे ।

सम्झौता अनुसार एथलेटिक्सको प्रशिक्षक प्रशिक्षण कार्यक्रम असोज ९ देखि १३ गते सम्म त्रिपुरेश्वरस्थित दशरथ रंगशालामा तथा आइटिएफ तेक्वान्दोको प्रशिक्षण असोज १६ र १७ गते रामेछापमा हुनेछ । रग्वीको असोज १९ र २० गते चितवनमा तथा कात्तिक ५ र ६ गते ब्याडमिन्टनको राखेप कभर्डहलमा हुनेछ । यि चार प्रशिक्षक तालिम सञ्चालनको लागि २० लाख रुपैयाँ बजेट रहेको बताइएको छ ।

बागमती प्रदेश खेलकुद बिकास परिषद्का सदस्यसचिव भण्डारीले यो कार्यक्रमलाई हरेक वर्ष गर्दै जाने र पहिलोपटक भएकाले यसपटक चार खेललाई मात्रै समेटिएको बताए । उनले राष्ट्रिय खेलकुद परिषद् (राखेप) ले आयोजना गर्ने सबै खेलको संघसँग सहकार्य गर्दै विस्तारै प्रशिक्षक प्रशिक्षण कोर्स गरिने जानकारी दिए ।

‘संघलाई पनि जिम्मेवार बनाउनुपर्छ । खेल विकास गर्ने दायित्व खेल संघकै हो ’ भण्डारीले भने, ‘प्रतियोगिता आयोजना र त्यसमा बजेट छुट्याएर मात्रै खेलकुदको विकास हुँदैन । त्यसका लागि भौतिक पुर्वाधारसँगै खेलाडी र प्राविधिक टोली (प्रशिक्षक र रेफ्री) को आवश्यकता हुन्छ । हामीले त्यसैलाई जोड दिएका हौं।’

खेल संघको तर्फबाट रग्वी संघका अध्यक्ष घिसिङले यो प्रशिक्षक तालिम अपरिहार्य रहेको र यो कार्यको थालनी गर्न लागेका बागमती प्रदेश खेलकुद विकास परिषद्प्रति आभार व्यक्त गरे ।