काठमाडौं (हाम्रो खेलकुद) – राष्ट्रिय ब्याडमिन्टन खेलाडी सीमा राजवंशीलाई मलेसियन ब्राण्डको फिलिटको नेपालमा रहेको फिलिट नेपालले प्रायोजन गरेको छ ।नेपालको लागि आधिकारिक बिक्रेता रहेको टु एम इन्टरनेसनलले सीमालाई रिभाइज लिजर पार्क खुल्ला राष्ट्रिय ब्याडमिन्टन च्याम्पियनसिप दौरान प्रायोजन गरेको हो ।

उनलाई टुर्नामेन्ट किट्स (खेल पोशाक, र्‍याकेट, स्ट्रिङ, जुत्ता, मोजा, ब्याग, ग्रिप) प्रदान गरिएको छ । फिलिट नेपालकी मार्केटिङ म्यानेजर मनिषा खड्काले यो सुरुवात मात्रै रहेको र आगमी दिनमा सीमासँगै अन्य खेलाडीलाई पनि प्रायोजना गर्ने योजना रहेको बताइन् ।

अब सीमाले फिलिट नेपालकै नामबाट रिभाइभ ब्याडमिन्टन च्याम्पियनसिप खेल्नेछिन् । उनले आफ्नो पहिलो खेलमा हरिसिद्धि क्लबकी सुनेना महर्जनलाई २१–५ र २१–२ को सोझो सेटमा हराउँदै विजयी सुरुवात गरेकी छिन् ।

जहँदा गाँउपालिका २ भाथीगछ मोरङकी १९ वर्षीय सीमा विश्व जुनियर वरीयतामा ४२औं स्थानमा रहेकी छिन् । नेपालको वरीयतामा नवौं स्थानमा रहेकी उनले जुनियर च्याम्पियनसिपसँगै सिनियर च्याम्पियनसिप खेल्दै उपाधि जितेकी छिन् ।

मलेसियन ब्रान्डको फिलिटलाई टु एम इन्टरनेसनलले करिब दुई महिना अघि नेपालमा भित्र्याएको हो । युएन पार्कमा मुख्य कार्यालय रहेको फिलिटले काठमाडौंमा चावाहिल, पेप्सीकोला र कलंकीसँगै उपत्यका बाहिर महेन्द्रनगर धनगढी, धादिङ, पोखरा र विराटनगरमा आफ्नो उत्पादनलाई पठाइसकेको छ । फिलिटले लामो समयदेखि ब्याडमिन्टनको मात्रै सामग्रीहरु उत्पादन गर्दै आइरहेको छ ।