काठमाडौं (हाम्रो खेलकुद) – ‘ए’ डिभिजन राष्ट्रिय फुटसल लिग खेल्ने तयारीमा रहेको लुम्बिनी फुटसल प्रालिले अल्फा बिटा ठिटा र चाइना ट्रेडलिंक प्रालिको साथ पाएको छ ।

अमेरिकाको टेक्सास शहरमा केन्द्रिय कार्यालय रहेको आइटी कम्पनी अल्फा बिटा ठिटा लुम्बिनी फुटसलसँग मुख्य प्रायोजक र विश्व स्तरीय खेल पोशाक उत्पादक कम्पनी लिनिङ प्रायोजकको रुपमा लुम्बिनीसँग जोडिएको हो ।

सम्झौतामा लुम्बिनी फुटसल प्रालिका प्रज्वल श्रेष्ठले अल्फा बिटा ठिटाका सिइओ मिजेस श्रेष्ठ र चाइना ट्रेडलिंक प्रालिका मार्केटिङ म्यानेजर कृत राज महर्जनले हस्ताक्षर गरे । सम्झौता अनुसार अल्फा बिटा ठिटाले लुम्बिनीलाई ४ लाख रुपैयाँ प्रदान गर्नेछ । लुम्बिनीले लगाउने जर्सीमा अल्फा बिटा ठिटाको लोगो हुनेछ ।

लिनिङले लुम्बिनीले लिग दौरान प्रयोग गर्ने जर्सी सेट, पोलो टि सर्ट गरी करिव दुई लाख बराबरका सामग्री उपलब्ध गराउनेछ । तिलोत्तमा नगरपालिका वडा नम्वर २ मा अवस्थित लुम्बिनीलाई यसअघि बुटवल उपमहानगरपालिका वडा नम्वर ५ मा रहेको ज्ञानी पोलिट्याङ्कस एन्ड पाइप कम्पनीले प्रायोजकको रुपमा १ लाख ५० हजार रुपैया सहयोग गरिसकेको छ ।

२ असोजबाट पोखराको बहुउद्देश्यीय कभर्ड हलमा शुरु हुने लिगको लागि लुम्बिनीले काठमाडौंमा अन्तिम तयारी गरेको र लिगको लागि तयार रहेको प्रशिक्षक प्रज्वल श्रेष्ठले जानकारी गराए ।

लुम्बिनी फुटसल प्रदेश ५ मा आयोजना भएको छनोटको च्याम्पियन बन्दै लिगलाई छनोट हुन सफल भएको थियो । लुम्बिनीमा भएको छनोटमा लुम्बिनी प्रदेश, कर्णाली प्रदेश र सुदूर पश्चिम प्रदेशबाट एक टोलीले मात्रै एक डिभिजिन लिगमा स्थान बनाउने थियो । प्रदेश १ बाट प्रतिनिधित्व नहुने भएपनि लुम्बिनीको छनोटमा दोस्रो भएको झरना फुटसलले अवसर थियो ।