काठमाडौं (हाम्रो खेलकुद) – राष्ट्रिय खेलकुद परिषद् (राखेप) का पूर्व सदस्य–सचिव रुक्मशमशेर राणालगायतको निधनमा राखेपले आइतबार शोक सभा आयोजना गरेको छ ।

स्व. राणालगायत खेलाडी, प्रशिक्षक, कर्मचारी, खेलकुद कर्मचारीका परिवार, खेल पदाधिकारीको निधनमा शोकसभा आयोजना गरिएको हो ।
कोरोना भाइरस (कोभिड– १९) को रोकथाम र नियन्त्रण गर्न लागू गरिएको निशेधाज्ञा– २ देखि हालसम्म निधन भएका खेलकुदसंग सम्बन्धितको सम्झनामा त्रिपुरेश्वरस्थित राखेप हातामा शोकसभा आयोजना गरिएको थियो ।

राखेपका सदस्य–सचिव रमेशकुमार सिलवाल, राखेप सदस्य एवं कार्यकारी समितिका सदस्यद्वय एकेन्द्र कुँवर र नन्दा बस्याल, राखेप सदस्य रिमबहादुर रानाभाट, सुभाष श्रेष्ठ, रेणुका श्रेष्ठ, राष्ट्रिय खेल संघका पदाधिकारी, कर्मचारी, प्रशिक्षकलगायतले दिवंगतहरुको तस्वीरमा पुष्पगुच्छा चढाईं भावपूर्ण श्रद्धाञ्जली अर्पन गरेका थियो ।

त्यसअघि उनीहरुको सम्झनामा १ मिनेट मौन धारणा गरिएको थियो । सोमबार राखेपअन्तर्गतका सम्पूर्ण कार्यालय बन्द गरिने भएको छ ।

राष्ट्रिय खेलकुद परिषद् (राखेप) का पूर्व सदस्यसचिव तथा नेपाल ओलम्पिक कमिटी (एनओसी) का पूर्व अध्यक्ष रुक्म शमशेर राणाको शुक्रबार राती ८५ वर्षको उमेरमा बत्तीसपुतलीस्थित निवासमा निधन भएको थियो । स्व. राणा दुईपटक राखेपको सदस्य–सचिव बनेका थिए ।

लामो समय खेलकुदका विभिन्न पदमा रहेका राणा दुई पटक (२०५१-५२, ०५४-५५) राखेप सदस्यसचिव बनेका थिए । उनी लामो समय एनओसीको नेतृत्वमा रहेका थिए । सन् १९९२ देखि १९९६ सम्म एनओसी महासचिव रहेका राणा १९९८ देखि २००७ सम्म अध्यक्ष रहेका थिए ।

हाल ओलम्पिक कमिटिका मानार्थ अध्यक्षसमेत रहेका उनी नेपाल ओलम्पिक कमिटी (एनओसी), नेपाल तेक्वान्दो संघ र नेपाल एथलेटिक्स संघका पूर्व अध्यक्ष हुन् । नेपाल कांग्रेसका नेता सुवर्ण शमशेर राणाका छोरा रुक्म शमशेर भारतका लागि पूर्व राजदुत पनि हुन् । राणाका श्रीमती र १ छोरी छन् ।