काठमाडौं (हाम्रो खेलकुद) – सर्वियाको राजधानी बेलग्रेडमा आयोजना हुने आईबा विश्व पुरुष बक्सिङ च्यापियन्सिपमा नेपालले सहभागिता जनाउने भएको छ ।

आईबा विश्व पुरुष बक्सिङ च्यापियन्सिपमा नेपालले सहभागिता जनाउने पक्का भएपछि नेपाल बक्सिङ संघले च्याम्पियनसिपको लागि खेलाडी छनोट गर्ने भएको छ । विश्व पुरुष बक्सिङ च्याम्पियनसिप अक्टोबर २५ देखि नोबेम्बर ६ तारिखसम्म बेलग्रेडमा आयोजना हुदैछ ।

प्रतियोगितामा सहभागी हुने खेलाडीहरुको छनोट प्रतियोगिताको लागि नेपाल बक्सिङ संघका सदस्य मानबहादुर भण्डारीको संयोजकत्वमा ५ सदस्यीय छनोट समिति गठन गरिएको संघले जनाएको छ । समितिमा राष्ट्रिय खेलकुद परिषद अन्तर्गत तालिम तथा प्रशिक्षण विभाग र राष्ट्रिय टिम तयारी समितिका एक–एक जना प्रतिनिधि, संघको टेक्निकल संयोजक र बक्सिङ प्रमुख प्रशिक्षक सदस्यको रुपमा रहनेछन् ।

आईबा विश्व पुरुष बक्सिङ च्यापियन्सिपका लागि नेपाल बक्सिङ संघले ४८–५१, ५४–५७, ६०–६३.५ ६३.५–६७ र ६७–७१ केजीको तौल समूहमा राष्ट्रव्यापी खुल्ला छनोट प्रतियोगिता आयोजना गर्नेछ । छनोट खेल १ देखि ३ असोजसम्म सातदोबाटोमा हुनेछ ।

खुल्ला छनोटबाट उत्कृष्ट खेलाडीहरुलाई च्यापियन्सिपका लागी चयन गरिने र खेलाडीको वरीयताको आधारमा कति खेलाडी च्यापियन्सिपमा छनोट हुने तय गरिने संघले जनाएको छ ।

आईबा विश्व पुरुष बक्सिङ च्यापियन्सिपको स्वर्णपदक विजेताले १ लाख स्वीस फ्रेन्क प्राप्त गर्नेछन् । यस्तै रजत पदक विजेताले ५० हजार स्वीस फ्रेन्क र कास्य पदक विजेताले २५ हजार स्वीस फ्रेन्क प्राप्त गर्ने छन् ।