काठमाडौं (हाम्रो खेलकुद) – फिडेमास्टर रुपेश जैसवालले नेपाल बुद्धिचाल संघका पूर्वअध्यक्ष एवं सहकारी अभियन्ता स्व.राजेशहरि जोशी स्मृति फिडे रेटिङ बुद्धिचाल प्रतियोगिताको उपाधि जितेका छन् ।

सजिलो सिभी डटकमका रुपेशले ९ खेलमा २ बराबरी र ७ जितका साथ ८ अंक प्राप्त उपाधि जितेका हुन् । समान साढे ७ अंक प्राप्त गरेपनि प्रोग्रेसिव टाइब्रेकमा थापाथली चेस क्लबका फिडे मास्टर क्षितिज घिमिरे दोश्रो र सर्लाहीका कमल श्रेष्ठ तेस्रो भए ।

उपाधिसँगै रुपेशले रनिङ शिल्ड, ट्रफि, मेडल र नगद ५० हजार हात पारे । दोस्रो र तेस्रो भएकाले क्रमशः नगद ३० र २० हजार प्राप्त गरे । ललितपुर स्पोर्टस् क्लबको आयोजनामा भएको प्रतियोगितामा डाइनामिक चेस एकेडेमी दमकका भुपेन्द्र निरौला चौथौं, भक्तपुरका युवा खेलाडी निकेन कुसाथा पाँचौ, सुमन लामा छैटौं, गणेशमान दुवाल सातौं, रौटहतका शुशिल चौधरी आठौं, दोलखाका राजिव कार्की नवौं र फिडेमास्टर मनिष हमाल दशौं भए ।

पाँच दिने प्रतियोगितामा महिलातर्फ सुजाना लोहनी, अनिषा न्यौपाने, आभा पुडासैनी क्रमशः प्रथम, दोश्रो र तेश्रा भए । उनीहरुले नगद १० हजार, ८ हजार र ६ हजार हात पारे । यसैगरी सजिन महर्जन ललितपुर उत्कृष्ट भै नगद ७ हजार प्राप्त गरे । अनरेटेडतर्फ सानुभाइ महर्जन प्रथम र विनय राई दोश्रा भए ।

विजयी तथा सहभागी खेलाडीलाई राखेपका सदस्यसचिव रमेश सिलवाल, क्लबका अध्यक्ष हेराकाजी महर्जन, ललितपुरका समाजसेवी प्रकाशनन्दन जोशी, जिल्ला सहकारी संघ ललितपुरका अध्यक्ष माधव दुलाललगायतले पुरस्कृत गरे ।