काठमाडौं, भदौं २७

नेपाल खेलकुद पत्रकार मञ्चले आफ्नौं २० औं बार्षिकोत्सवको अवसरमा आइतबार मञ्चको केन्द्रिय कार्यालय त्रिपुरेश्वरमा चियापान कार्यक्रमको आयोजना गयो ।

सो अवसरमा मञ्चका अध्यक्ष अजय फुयालले सबै खेलपत्रकारलाई शुभकामना दिदै हरेक बर्ष आयोजना हुने पल्सर स्पोर्टस् अवार्डको मिति चाडै सार्वजनिक गरिने जानकारी गराए । ‘विनाशकारी भूकम्पका कारण सबै क्षेत्रमा त्यसको प्रभाव परेको छ ,’ फुयालले भन्नुभयो,‘त्यसले हामीलाई पनि असर गरेको छ । तर, हामी खेलकुद क्षेत्रकै गरिमा बनेको स्पोर्टस् अवार्ड यो बर्ष पनि आयोजना गर्नेछौं । अनुकुल समयमा मितिको घोषणा गर्नेछौं ।’

मञ्चका निवर्तमान अध्यक्ष एवम् एसियाली खेलकुद पत्रकार संघ (एआइपिएस एसिया) का केन्द्रिय सदस्य नीरञ्जन राजवंशीले मञ्चले दुई दशक लगाएर आर्जन गरेको प्रतिष्ठालाई जोगाउन चुनौति रहेको बताए । मञ्चका सचिव एवम् नेपाल पत्रकार महासंघका सदस्य प्रकाश तिमल्सिनाले दुई दशकअघि थोरै खेलकुद पत्रकारले स्थापना गरेको मञ्चको आकार अहिले ठूलो भएको उल्लेख गर्दै भने,‘ हामी अहिले देशभर गरि २ सय भन्दा बढी सदस्य छौं । मञ्चले सधै जिम्मेवार खेलकुद पत्रकारिताका लागि प्रेरित गरेको छ र गर्नेछ ।’

शुभकामना दिने क्रममा नेपाल पत्रकार महासंघका सदस्य समेत रहेका राष्ट्रिय खेलकुद परिषद्का प्रेस सल्लाहकार रोहित दाहालले मञ्चसँग सहकार्य गर्न परिषद् तयार रहेको बताए । उहाँले नजिकिदै गरेको सातौं राष्ट्रिय खेलकुदअघि पूर्वाञ्चलका ६ जिल्ला (राष्ट्रिय खेलकुदका खेल सञ्चालन हुने जिल्ला) मा तालिम सञ्चालन गर्न सकिने उल्लेख गरे । मञ्चका बाँके समन्वय शाखाका अध्यक्ष जयनारायण शाहले मञ्चले क्षेत्रिय मञ्चको अवधारणालाई विधानमै व्यवस्था गर्नु उचित हुने सुझाव दिए । आरजे स्पोर्टस्का प्रबन्ध निर्देशक जनक न्यौपानेले शुभकामना दिदै थप सफलताको कामना गरे ।